क्यान्सरको रोकथाम र नियन्त्रण गर्न सबै सक्रिय हुनुपर्ने

हेल्थ टुडे,
चितवन, ११ भदौः नेपाल अबुर्द रोग निवारण संस्था चितवन शाखाले २१ औं वार्षिक साधारण सभा सम्पन्न भएको छ । भरतपुर महानगरपालिकाकी मेयर रेनु दाहालले सभाको उद्घाटन गर्नुभएको छ ।
रोटरी सामुदायिक भवन गणेस्थान भरतपुर ११ मा सम्पन्न सभामा बोल्दै मेयर रेनु दाहालले भरतपुर स्थित बिपी कोइराला क्यान्सर अस्पतालको क्षमता विस्तार गरी प्रतिष्ठान बनाउन आफू सक्रिय रुपमा लागरहेको बताउनुभयो ।
सबै प्रकारका क्यान्सरका बिरामीहरूलाई सर्वसुलभ र गुणस्तरीय सेवा प्रदान गर्न महानगर समेत क्रियाशिल रहेको बताउदै उहाँले भयावह बनिरहेको क्यान्सरको रोकथाम, निदान र नियन्त्रण गर्न सबै सक्रिय हुनु आवश्यक रहेको बताउनुभयो ।
उहाँले क्यान्सरका सबै प्रकारका बिरामीहरूलाई सर्वसुलभ उपचारको व्यवस्था मिलाउन नगरपरिषदबाट निर्णय समेत गरी अगाडि बढिरहेको जानकारी दिनुभयो ।
यस्तै अबुर्द रोग निवारण संस्था चितवनले क्यान्सर सम्बन्धी सचेतना, क्यान्सर परीक्षण र उपचारको साथै बिरामी कुरूवा घरसमेत संचालन गरेकोमा मेयर रेनुले प्रशंसा गर्नुभएको छ ।
चितवनका प्रमुख जिल्ला अधिकारी जितेन्द्र बस्नेतले क्यान्सर अस्पताललमा विचौलियालाई पूर्ण प्रतिबन्ध गर्दै सबै जनताले सहज रुपमा उपचार पाउने प्रक्रिया थप सहज बनाउन चितवन प्रशासनले नयाँ रणनिति तयारी गरेको बताउनुभयो ।
संस्थाका अध्यक्ष दिनेश चुकेले बार्षिक प्रगति प्रतिवेदन सार्वजनिक गरेको कार्यक्रममा कोषाध्यक्ष ऋतु गिरीले बार्षिक आयव्यय विवरण प्रस्तुत गर्नुभएको थियो ।
रोटरी क्लब चितवनका अध्यक्ष कपिलबाबु खनाल उद्योग वाणिज्य संघ चितवनका अध्यक्ष सहनलाल प्रधानले मन्तव्य राख्नुभयो ।
सो अवसरमा क्यान्सर पीडित कल्पना प्रधानलाई उपचारमा सहयोग र्पुयाउन नगद २० हजार आर्थिक सहयोग प्रदान गरिएको थियो । अबुर्द रोग निवारण सस्थालाई आर्थिक सहयोग गर्ने चन्दादाता बाबुराम अधिकारी लगायतलाई सम्मान पनि गरिएको थियो ।