विधान संशोधनपछि औषधि व्यवसायी संघ प्रादेशिक संरचनामा

हेल्थ टुडे,

काठमाडौं : देश भरिका औषधि व्यवसायीको छाता संगठन नेपाल औषधि व्यवसायी संघले आफ्नो विधान संशोधन गरेर प्रादेशिक संरचनामा लगेको छ । नेपालगन्जमा भएको संघको साधारण सभाले अञ्चल शाखा खारेज  गर्दै प्रादेशिक संरचनामा जाने विधान संशोधन गरेको हो । विधान संशोधन समितिका संयोजक बाबुराम भट्टराईका अनुसार सर्वसम्मत रुपमा विधान संसोधन भएको हो । उनले भने, ‘अब संघमा केन्द्रिय समिति, प्रदेश समिति र जिल्ला साखा रहने व्यवस्था भएको छ ।’ जिल्ला साखाका पदाधिकारीले प्रदेश समिति बनाउने र प्रदेश समितिले केन्द्रिय समिति बनाउने व्यवस्था विधानमा गरिएको भट्टराईले जानकारी दिए ।

साधारण सभाले अगामी पुष भित्र संघको केन्द्रिय अधिवेशन गर्ने विषयमा छलफल गरेको छ । नेपाल औषधि व्यवसायी संघका अध्यक्ष मृगेन्द्र मेहर श्रेष्ठले सभाको उद्घाटन र समापन गरेका थिए । साधारणसभामा भाग लिन देशभरिबाट आएका प्रतिनिधिले संघका महासचिव हरि विडारीको कार्यशैली र नेतृत्व क्षमतामाथि प्रश्न उठाउदै संघलाई प्रभावकारी बनाउन केन्द्रमा क्षमतावान र स्वच्छ छविको नेतृत्व हुनु पर्नेमा जोड दिएका थिए ।