सरकारी चिकित्सक पनि नयाँ स्वास्थ्य सचिवको विरोधमा

हेल्थ टुडे,

काठमाडौं, २५ मंसिर :  सरकारले राजनीतिक भागबण्डा गर्दै स्वास्थ्य तथा जनसंख्या मन्त्रालयमा नियम बिपरित प्रशासन तर्फको सचिव नियुक्त गरेकोमा सरकारी चिकित्सक संघ नेपाल ( गोदान) ले पनि विरोध गर्दै उक्त निर्णय तत्काल सच्याउन माग गरेको छ । स्वास्थ्य जस्तो प्राविधिक विषयमा योग्य अनुभवी स्वास्थ्यकर्मी हुदाहुदै भागबण्डाका आधारमा प्रशासनको कर्मचारीलाई सचिवको जिम्मेवारी दिदै स्वास्थ्य क्षेत्र नै तहसनहस हुने भन्दै संघले निर्णय नसच्याए आन्दोलनका थप कार्यक्रम घोषणा गर्ने चेतावनी दिएको छ । संघका अध्यक्ष डा. दीपेन्द्र पाण्डेले हस्तक्षरित गरेको  विज्ञप्तिमा भनिएको छ, स्वास्थ्यमा आजिवन अनुभव भएका कुशल सचिव हुन योग्य स्वास्थ्यकर्मी हुदाहुदै उहाँको योगदान, अनुभव र दूरदर्शितालाई पाखा लगाउदै केवल राजनीतिक भागबण्डाको आधारमा सचिव नियुक्त गर्दा सम्पूर्ण स्वास्थ्यकर्मी निरास हुनुका साथै स्वास्थ्य क्षेत्र नै धरासायी हुने छ । ’ 

मन्त्रीपरिषद्ले गत सोमबार प्रधानमन्त्री कार्यालयका सचिव केदारबहादुर अधिकारीलाई स्वास्थ्य तथा जनसंख्या मन्त्रालय सरुवा गरेको थियो । अधिकारीले एक हप्तापछि सोमबार पद बहाली गरेका छन् । उनले पद बहाली गरेसँगै देश भरिका चिकित्सक र स्वास्थ्यकर्मी आन्दालिन भएका छन् । देश भरिका चिकित्सकहरुको छाता संगठन नेपाल चिकित्सक संघले सोमबार नै विज्ञप्ति प्रकाशित गरि नियम बिपरित प्रशासनको कर्मचारीलाई सचिव नियुक्त गरिएकोमा विरोध गर्दै निर्णय सच्याउन सरकारलाई आग्रह गरेको छ । स्वास्थ्य तथा जनसंख्या मन्त्रालयकी सचिव डा. पुष्पा चौधरीको गत असोज २८ गते प्रधानमन्त्री कार्यालय सरुवा गरेपछि निमित्त स्वास्थ्य सचिवको जिम्मेवारी प्रमुख विशेषज्ञ डा. शुशिलनाथ प्याकुरेलले सम्हालै आएका छन् । प्रधानमन्त्री कार्यालयका सचिव अधिकारीलाई स्वास्थ्यमा सरुवा गरेको सूचना ६ दिनपछि बल्ल बाहिर आएको थियो । स्वास्थ्यमा प्राविधिक र प्रशासनका गरि दुई सचिव राख्ने निर्णय गरेको हो वा प्रशासन तर्फको एक जना सचिवले मात्र मन्त्रालयको नेतृत्व गर्ने हो त्यो अझैसम्म पनि सार्वजनिक गरेको छैन । नियम अनुसार स्वास्थ्यमा प्रशासन तर्फको कर्मचारीले सचिव हुन पाउदैन ।

यो भन्दा पहिले डा. चौधरी, डा. किरण रेग्मी, डा. सेनेन्द्र उप्रेति, डा. सुधा शर्मा, डा. प्रविण मिश्र, डा. दीर्घसिंह बम, डा. निराकारमान श्रेष्ठ लगायतका चिकित्सकले सचिवको जिम्मेवारी सम्हालिसकेका छन । स्वास्थ्य मन्त्रालय मातहत करिव ३७ हजार कर्मचारी छन । ती मध्ये ठूलो संख्यामा स्वास्थ्यकर्मी छन ।