अंग प्रत्यारोपण समन्वय समितिको अध्यक्षका लागि खुला आवेदन आह्वान

हेल्थ टुडे,
काठमाडौं, २६ असार : स्वास्थ्य तथा खाद्य स्वच्छता मन्त्रालयले लामो समयदेखि नेतृत्वविहीन रहेको अंग प्रत्यारोपण समन्वय समितिको अध्यक्षको लागि आवेदन आव्हान गरेको छ । मन्त्रालयले ’मानव शरीरको अंग प्रत्यारोपण (नियमित तथा निषेध) ऐन, २०५५’ को दफा १२ बमोजिम गठन हुने समितिको अध्यक्ष पदका लागि खुला आवेदन आह्वान गरेको हो ।
गत १९ वैशाखमा जारी अध्यादेशका कारण पुराना नियुक्तिहरू बदर भई यो समिति पदाधिकारीविहीन बनेको थियो । समितिको अनुपस्थितिका कारण नयाँ स्वास्थ्य संस्थाहरूले प्रत्यारोपणको लाइसेन्स पाउन सकेका छैनन् भने प्रत्यारोपण सम्बन्धी अन्य महत्त्वपूर्ण कामहरू समेत ठप्प छन् ।
योग्य र इच्छुक उम्मेदवारहरूले २०८३ साउन ४ गते कार्यालय समयभित्र मन्त्रालयको नीति, योजना तथा अनुगमन महाशाखामा आवेदन दिनुपर्ने मन्त्रालयले जनाएको छ । अध्यक्ष पदका लागि चाहिने योग्यताहरूमा नागरिकताः नेपाली नागरिक हुनुपर्ने,चिकित्साशास्त्रमा कम्तीमा स्नातकोत्तर (एमडी÷एमएस वा सोसरह) उपाधि प्राप्त गरेको हुनु पर्ने र काउन्सिल दर्ताः नेपाल मेडिकल काउन्सिलमा विशेषज्ञ चिकित्सकका रूपमा स्थायी दर्ता भएको हुनु पर्ने छ । यसका साथै विशेषज्ञ चिकित्सकका रूपमा कम्तीमा १० वर्ष काम गरेको कार्य अनुभव र अतिरिक्त अनुभवमा स्वास्थ्य सम्बन्धी कानुन, नीति तथा सार्वजनिक निकायको नेतृत्वदायी भूमिका सम्हालेको हुनुपर्ने उल्लेख गरिएको छ । तर अंग प्रत्यारोपणका क्षेत्रमा काम गरेको अनुभव भने समावेश गरेको छैन । एक जना विज्ञका अनुसार अंग प्रत्यारोपणका क्षेत्रमा नेतृत्व तहमा रहेको विज्ञ हुनु पर्ने कुरा छनौटको आधारमा नराख्दा त्यस विषयमा ज्ञान नै नभएको वयक्ति समेत छनौट हुने अवस्था रहन्छ । त्यसैले सरकारले त्यो कुरामा विशेष ध्यान दिन जरुरी छ ।
प्राप्त आवेदनहरूको प्रारम्भिक जाँचबुझ गरी योग्य उम्मेदवारहरूको सर्टलिस्ट तयार गरिने र सर्टलिस्टमा परेका आवेदकहरूलाई एकै दिन प्रस्तुतीकरण र अन्तर्वार्ताका लागि बोलाइने मन्त्रालयले जनाएको छ । शैक्षिक योग्यता र अनुभव वाफत ३० अंक, प्रस्तुतीकरण वाफत ३५ अंक र
अन्तर्वार्ता वाफत ३५ अंक विभाजन गरेर सबै भन्दा बढी अंक ल्याउने विज्ञलाई अध्यक्षमा छनौट गरिने मन्त्रालयले जानकारी गराएको छ ।