थाहा नगरपालिकामा आँखा अस्पताल सञ्चालन

हेल्थ टुडे,
मकवानपुर,२८ फागुनः मकवानपुरको उत्तरी क्षेत्र थाहा नगरपालिका–३ मा स्थापना भएको सामुदायिक आँखा केन्द्र सञ्चालनमा आएको छ । सामुदायिक आँखा केन्द्र, नेपाल आँखा कार्यक्रम र तिलगङ्गा आँखा प्रतिष्ठान काठमाडौँको समन्वयमा अस्पतालले सेवा सुरु गरेको हो ।

अस्पतालले सेवा दिन सुरु गरेपछि मकवानपुर उत्तरी क्षेत्रका स्थानीय आँखाका बिरामीलाई उपचारका लागि सहयोग पुगेको छ । नगरपालिका र तिलगङ्गा आँखा अस्पताल प्रतिष्ठान काठमाडौँबीच २०७५ वैशाखमा भएको सम्झौताअनुसार नगरपालिकाले दुई रोपनी १४ आना जमीन उपलब्ध गराएपछि केन्द्रको भवनसमेत निर्माण गरिएको हो ।

नगरपालिकाको रु ४० लाख लागतमा सो केन्द्रका लागि चारकोठे पक्की भवनसमेत निर्माण गरिएको छ । आँखाका रोगीलाई थप सुविधा दिने उद्देश्यले अस्पतालको रूपमा उपचार केन्द्र स्थापना गरिएको नगरपालिकाले जनाएको छ ।