हेल्थ टुडे,
काठमाडौ,२६ चैतः स्वास्थ्य सुरक्षा विकास बोर्डको पछिल्लो तथ्याङ्कले स्वास्थ्य बिमा कार्यक्रममा पुरुष भन्दा महिलाको बढी आकर्षण रहेको देखाएको छ । नेपालमा स्वास्थ्य बिमा सुरु भएको तीन वर्षमा स्वास्थ्य बिमा गराउनेमा महिलाको संख्या बढी देखिएको छ । ३ वर्षको अवधिमा ५८ प्रतिशत महिला र ४२ प्रतिशत पुरुषले सेवा लिएका हुन् ।
सरकारले सामाजिक स्वास्थ्य सुरक्षा विकास बोर्डमार्फत २०७२ साल चैत २५ गतेदेखि स्वास्थ्य बिमा कार्यक्रम सुरु गरेको थियो। बोर्डको तथ्याङ्क अनुसार तीन वर्षमा १५ लाख ७१ हजार ४ सय ८८ जना बिमा कार्यक्रमा आवद्ध भएका छन्। जसमध्ये ५ लाख १२ हजार ८ सय १७ जनाले सेवा लिएका छन्। यसमा अति गरिव ३ लाख २२ हजार १ सय ३४ जना रहेका छन्। बोर्डले दिएको जानकारी अनुसार पछिल्लो समयमा बिमा नविकरण गर्नेहरुको संख्या बढ्दो छ ।
स्वास्थ्य बिमा कार्यक्रम मुलुकका ४२ वटा जिल्लामा बिस्तार भइसकेको र यसलाई बढाउँदै आगामी वर्षसम्म ७७ वटै जिल्लामा बिमा कार्यक्रम बिस्तार गर्ने योजना रहेको नेपाल स्वास्थ्य बिमा वोर्डले जनाएको छ । २५ सय तिरेर बिमा सदस्य बन्ने र ५० हजार बराबरको निःशुल्क उपचार सेवा लिने व्यवस्था गरिएको थियो । अब भने ३५ सय तिरेर बिमा सदस्य बनेर १ लाख बराबरको निःशुल्क उपचार सेवा लिने व्यवस्था गरिएको बोर्डले जनाएको छ ।
बिमा रकम तिर्न नसक्ने विपन्न वर्गको हकमा भने सरकारले नै बिमा रकम वापतको शुल्क तिरिदिने व्यवस्था गरेको छ । सरकारले अति विपन्न नागरिकलाई शतप्रतिशत, विपन्नलाई ७५ प्रतिशत तथा गरिबीको रेखा मुनी रहेकालाई ५० प्रतिशतका दरले बिमा रकम वापतको शुल्क तिरिदिने व्यवस्था गरेको छ ।
बिमा कार्यक्रममा आवद्ध भएका कुनै पनि व्यक्तिले तोकिएको कुनै पनि सरकारी अस्पतालबाट ओपीडी सेवा, इमर्जेन्सी, ल्याब, सामान्य अपरेशन लगायतका उपचार प्राप्त गर्नुका साथै सरकारले तोकेको निःशुल्क औषधी सजिलैसँग प्राप्त गर्ने व्यवस्था गरिएको बोर्डले जनाएको छ ।
तर, कस्मेटिक सर्जरी, कुनै पनि झै–झगडाका कारण लागेको चोटपटक, मादक पदार्थ सेवन गरे पश्चात भएको कुनै पनि दुर्घटना वा चोटपटक, गर्भपतन गराएको खण्डमा भने यस्ता उपचार खर्चलाई बिमाले समेट्न सक्दैन ।
Leave a Reply