सरकारी तथा गैरसरकारी स्वास्थ्य संस्था ठप्प पार्ने चिकित्सक संघको चेतावनी

हेल्थ टुडे,
काठमाडौ,२९ चैतः डाक्टरहरूको छाता संगठन नेपाल चिकित्सक संघले सरकारी चिकित्सकको आन्दोलनलाई समर्थन गर्दै सरकारलाई ७२ घण्टे अल्टिमेटम दिएको छ । संघले आफुहरुले दिएको समयसिमाभित्र माग सम्बोधनको पहल नभए देशभरका सबै सरकारी तथा गैरसरकारी स्वास्थ्य संस्था ठप्प पार्ने चेतावनी दिएको छ ।

बिहीबार सबै अस्पतालका पदाधिकारी, डाक्टरका विभिन्न संघसंगठनको भेलापछि संघले सरकारलाई ७२ घण्टे अल्टिमेटमसहितको चेतावनी दिएको हो । समायोजनसँग असन्तुष्टि जनाउँदै सरकारी डाक्टरले एक सातादेखि सरकारी अस्पतालका आकस्मिक सेवाहरु बहिस्कार गर्दै आएका छन् । तर,सरकार भने समस्या समाधानप्रति सम्बेदनशिल देखिएको छैन् ।

नेपाल चिकित्सक संघका अध्यक्ष मुक्तिराम श्रेष्ठले भनेः‘ १४ सय डाक्टरलाई जसरी पनि ठेगान लगाउन सकिन्छ भनेर पेल्न खोज्नु दुर्भाग्य हुन्छ,विशेषज्ञता हासिल गरेको सर्जन कुनै स्थानीय तहमा समायोजन भएको छ, उसले टिम र उपकरणविना कसरी अप्रेसन गर्छ ?’

भेलामा सहभागी डाक्टरहरूले सरकारले आफ्नो आवाज नसुने सरकारी सेवा त्याग्न सक्ने बताएका छन् । केही दिनअघि सरकारी चिकित्सक संघका करिब सात सय डाक्टरले राजीनामाका लागि हस्ताक्षर संकलन गरिसकेका छन् ।कर्मचारी समायोजनको बिरोध गर्दै सरकारी चिकित्सकहरु एक सातादेखि आन्दोलनमा छन् ।