ज्येष्ठ नागरिक स्वास्थ बीमा अभियान सुरु

हेल्थ टुडे,
काठमाडौ,२ बैशाखः सरकारले ज्येष्ठ नागरिक स्वास्थ्य बिमा अभियान सुरु गरेको छ । अभियानको पहिलो दिन ५५ जना वृद्धवृद्धाले प्रमाणपत्र लिएका छन् । सरकारले ७० वर्षमाथिका ज्येष्ठ नागरिक र गरीबीको रेखामुनि रहेका विपन्न नागरिकको निःशुल्क बीमा गर्न सहयोग गर्नेछ । १ लाखसम्मको स्वास्थ्य बीमाका लागि नेपाल सरकारले प्रिमियम तिर्ने भएको हो ।

स्वास्थ्य संस्थाको क्षमता अभिवृद्धि गर्न दुई हजार दुई सय वडा कार्यालयमध्ये एक हजार दुई सयमा स्वास्थ्य चौकी निर्माणका लागि बजेट विनियोजन गरिएको सरकारले जनाएको छ । स्वास्थ्य बिमा कार्यक्रमले ज्येष्ठ नागरिकहरुको स्वास्थ्य उपचारमा ठूलो सहयोग गर्ने अपेक्षा गरिएको छ । स्वास्थ्य बीमा लिएकाहरुले स्वास्थ बिमाबाट स्वास्थ्य उपचार सहज हुने भन्दै खुशी व्यक्त गरेका छन् ।

सरकारले सबै नागरिकलाई स्वास्थ्य बीमामा आवद्ध गराउने सरकारको नीति रहेकोले ७० वर्षमाथिका ज्येष्ठ नागरिक र विपन्न नागरिकको निःशुल्क बीमा गर्न सहयोग गर्ने जनाएको छ । बीमा कार्यक्रमले गरिबी हटाउन मद्धत पुग्ने भन्दै सबैलाई यसमा आबद्ध हुन सरकारले आह्वान गरेको छ । स्वास्थ बीमा कार्यक्रममा उमेर पुगेका सबै वृद्धवृद्धालाई समावेश गर्न सके कार्यक्रमको प्रभावकारीता अझै बढ्नेछ । यसका लागि कार्यान्वयन पक्षमा भने ध्यान दिनुपर्ने देखिन्छ ।

स्वास्थ्य बीमा बोर्डका कार्यकारी निर्देशक गणेश पोखरेलेका अनुसार बि.स. २०७२ मा कैलालीबाट शुरु भएको स्वास्थ्य बीमा हाल ४२ जिल्लामा पुगेको र बाँकी जिल्लामा क्रमशः विस्तार हुनेछ । यस बीमा कार्यक्रममा हालसम्म १६ लाख नागरिक आबद्ध भइसकेका छन् । तीमध्ये ५३ प्रतिशत पुरुष र ४७ प्रतिशत महिला छन् ।