हेल्थ टुडे,
डोटी,१८ जेठः गर्मी बढेसँगै डोटीमा आँखा पाक्ने रोगको महामारी फैलिएको छ । सुरुसुरुमा आँखा चिलाउने तथा पछि गएर आँखा रातो हुने र आँखाबाट पानी बग्ने लक्षण देखिएको उपचारमा संलग्न चिकित्सकहरुले बताएका छन् । गर्मी र दूषित हावापानीका कारण यो रोग सर्ने गरेको भन्दै सचेत रहन तर आत्तिनुपर्ने अवस्था भने नरहेको चिकित्सकले जनाएका छन् ।
जिल्ला अस्पताल डोटीले गर्मीका कारण आँखा पाक्ने बिरामीको सङ्ख्या अस्पतालमा दिनहुँ एक दर्जन बढी पुग्ने गरेको जनाएको छ । सरकारी अस्पतालमा मात्र नभई जिल्लाका निजी मेडिकल तथा क्लिनिकमा पनि आँखा पाक्ने बिरामीको दैनिक भीड लाग्ने गरेको छ । जिल्ला अस्पताल डोटीले आँखा पाक्ने रोगबाट सबैभन्दा बढी स्कूले केटाकेटी तथा वृद्धवृद्धा पीडित बनेको जनाएको छ ।
यहाँका ग्रामीण क्षेत्रमा समेत यो रोगले विगत केही दिनयतादेखि विकराल रूप लिएको स्थानीय बासिन्दाले जनाउका छन् । आँखा पाक्न थालेपछि कतिपय विद्यार्थी स्कूल जान समेत छाडेका छन् । जिल्ला स्वास्थ्य कार्यालय डोटीले फोहर, धुलो धुवासँगै ‘व्याक्टेरिया’ तथा व्यक्तिगत स्वास्थ्य कमजोर भएका कारण आँखाको रोग एकअर्कामा सर्ने बढी सम्भावना हुने जनाएको छ । सधैँ सफा र चिसोपानीले आँखा, मुख धुने तथा चर्को गर्मीमा नहिँड्ने तथा हिँड्नै परे चश्माको प्रयोग गरे यो रोग एकअर्कामा सर्ने सम्भावना कम हुन्छ
Leave a Reply