हेल्थ टुडे,
काठमाडौ,१८ जेठः त्रि.वि शिक्षण अस्पताल महाराजगन्जमा पहिलो पटक सफलतापूर्वक कलेजो प्रत्यारोपण भएको छ । विश्वमै अत्यन्तै कठिन र जटिल मानिने प्रत्यारोपण तीन वर्षको अथक प्रयासपछि त्रि.वि शिक्षण अस्पतालमा कलेजो प्रत्यारोपण गर्न चिकित्सकहरु सफल भएका हुन् । प्रा.डा रमेशसिंह भण्डारीको नेतृत्वमा शिक्षण अस्पताल महाराजगन्जमा काठमाडौं निवासी ५८ वर्षीय एक व्यक्तिको कलेजो प्रत्यारोपण गरिएको हो । उनलाई ३३ वर्षकी छोरीले कलेजो दान गरेकी हुन् ।
डा.भण्डारीका अनुसार शुक्रबार बिहान ८ बजेबाट सुरु भएको प्रत्यारोपण राती १२ बजेर ३० मिनेट जाँदा करिब १६ घण्टा लगाएर प्रत्यारोपण सकिएको थियो । शल्यक्रियामा डाक्टर, नर्स तथा स्वास्थ्यकर्मीसहित झण्डै ५० जनाको टोली सहभागी भएको जनाइएको छ । सर्जरीमा डा.भण्डारीको नेतृत्वमा १२ जना चिकित्सक सामेल थिए।
नेपाली चिकित्सकलाई साथ दिन भारतको एपोलो अस्पतालका प्रत्यारोपण विशेषज्ञ डा.निरव गौरको टिम आएको थियो । अस्पतालमा पहिलो पटक कलेजो प्रत्यारोपण भएको हो । यसअघि भक्तपुरस्थित मानव अंग प्रत्यारोपण केन्द्रमा कलेजो प्रत्यारोपण भएको थियो । तर,भक्तपुरको मानव अंग प्रत्यारोपणमा नियमित हुन सकेको छैन् ।
शिक्षण अस्पतालका सर्जन डा. भण्डारीले दक्ष र चुस्त टिम भएकाले अस्पतालमा कलेजो प्रत्यारोपण कार्य नियमित हुने जानकारी दिए । भारतमा एक करोड बढी रकम लाग्ने प्रत्यारोपण नेपालमा २५ लाखमै प्रत्यारोपण हुने चिकित्सकले बताएका छन् । अस्पतालले १ वर्षमा १२ वटा कलेजो प्रत्यारोपण गर्ने लक्ष्य लिएको छ ।
Leave a Reply