स्वास्थ्य उपचारको लागि प्रधानमन्त्री ओली सिंगापुर जाँदै

हेल्थ टुडे,
काठमाडौ,१८ साउनः स्वास्थ्यमा समस्या देखिएपछि विशेषज्ञ चिकित्सकको राय लिन र स्वास्थ्यको ‘फलो अप’ परीक्षण गर्न प्रधानमन्त्री केपी शर्मा ओली आज सााझ सिंगापुर जाँदैछन् । नियमित औषधि सेवनसँगै अनिदो बस्न नहुने, न्युनतम सात घण्टा सुत्नुपर्ने र धपेडीबाट बच्न चिकित्सकले दिएको सुझाव वेवास्ता गरेपछि प्रधानमन्त्री ओलीको स्वास्थ्यमा समस्या आएको हो ।

एकसाता अघि त्रिवि शिक्षण अस्पताल परिसरमा रहेको मनमोहोन कार्डियो भास्कुलर थेरासिक एण्ड ट्रान्सप्लान्ट सेन्टरमा कोठा खाली नभएपछि छाउनीस्थित वीरेन्द्र सैनिक अस्पतालमा स्वास्थ्य जाँच गराएका प्रधानमन्त्री ओली थप स्वास्थ्य जाँच गर्न सिंगापुर जान लागेका हुन । प्रधानमन्त्रीका निजी चिकित्सक डा.दिव्या सिंहले अहिले विशेषज्ञ डाक्टरको राय लिन प्रधानमन्त्री ओली सिंगापुर जान लागेको जानकारी दिईन् ।

उनका अनुसार पछिल्लो दुई वर्षयता विज्ञ डाक्टरहरुले प्रधानमन्त्री ओलीको ‘रिपोर्ट कार्ड’ हेरेका छैनन् । ओलीको सुगरको मात्रा तलमाथि हुने गरेको चिकित्सकले बताएका छन् । यसअघि बैंककमा भएको स्वास्थ्य परीक्षणमा उनको मिर्गौलाको अवस्था सामान्य रहेको बताइए पनि दाहिने हात सुन्निएपछि छालाको बायोस्पी गरिएको र त्यसमा देखा परेका समस्याहरुको उपचार गरिएको थियो ।

कडा औषधि सेवन गरिरहेका प्रधानमन्त्री ओलीको झण्डै १२ वर्षअघि प्रत्यारोपित मिर्गौलाको ‘बलुन डाइलेसन’ पछि उपचार भएको थियो । प्रधानमन्त्री ओलीले सेवन गरिरहेका कतिपय औषधिले थकान कम गर्ने, शक्ति दिने र वान्ता हुनबाट बचाउने गरेको उनको स्वास्थ्यको निगरानी गरिरहेका चिकित्सकले दावी गरेका छन् ।