हेल्थ टुडे,
काठमाडौ,७ असोजः त्रिवि चिकित्साशास्त्र अध्ययन संस्थानले यही असोज ३ गते र काठमाडौँ विश्वविद्यालयले असोज ४ गते परीक्षा सञ्चालन गरेका एमबीबीएस प्रवेश परीक्षाको नतिजा सार्वजनिक गरेको छ । त्रिभुवन विश्वविद्यालय र काठमाडौँ विश्वविद्यालयले सोमबार चिकित्सा शिक्षाअन्तर्गत एमबीबीएस तहको प्रवेश परीक्षाको नतिजा सार्वजनिक गरेका हुन् ।
प्रकाशित नतिजाअनुसार त्रिभुवन विश्वविद्यालयतर्फ नवलपरासीका महम्मद नवाज अन्सारी र कैलालीका विशाल मण्डलले सर्वोत्कृष्ट अङ्क अर्थात् ९५ प्राप्ताङ्क ल्याएका छन्। यसैगरी, काठमाडौँ विश्वविद्यालयतर्फ देवनारायण साहले ८८ प्राप्ताङ्क ल्याएका छन् ।
चिकित्सा शिक्षातर्फ एमबीबीएसका लागि दुई विश्वविद्यालयले लिएको प्रवेश परीक्षामा करीब १९ हजार विद्यार्थी सहभागी भएकामा आठ हजार ७ सय ५६ जना उत्तीर्ण भएका छन् । त्रिविअन्तर्गतका कजेजमा चार हजार २ सय ६९ र काठमाडौँ विश्वविद्यालयअन्तर्गत चार हजार ४ सय ८७ विद्यार्थी उत्तीर्ण भएका छन्। दुवै विश्वविद्यालयका न्यूनतम् उत्तीर्णाङ्क प्रतिशत ५० रहेको थियो। ती दुवै विश्वविद्यालयका २२ कलेजमा एमबीबीएस तहको अध्ययन अध्यापन हुने गर्छ ।
यसैबीच,त्रिवि चिकित्सा शास्त्र अध्ययन संस्थान (आइओएम)ले बिडिएस, नर्सिङ लगायतका विषयको पनि प्रवेश परीक्षाको नतिजा सार्वजनिक गरेको छ । बिडिएसको प्रवेश परीक्षामा मोरङका विशाल बस्नेतले सर्वोत्कृष्ट ९२ अंक ल्याएका छन् ।
मन्त्रिपरिषद्को २०७५ असोज २८ गतेको बैठकले चिकित्सा शिक्षाअन्तर्गत स्नातक तहका एमबीबीएस र बीडीएसको शुल्क निर्धारण गरेको थियो। एमबीबीएसका लागि काठमाडौँ उपत्यकामा ३८ लाख ५० हजार रुपैयाँ तथा उपत्यका बाहिर ४२ लाख ४५ हजार रुपैयाँ र बीडीएस कार्यक्रमका लागि १९ लाख ३२ हजार ६ सय १२ रुपैयाँ शुल्क निर्धारण भएको छ।
Leave a Reply