चिकित्सा शिक्षा आयोगको निर्देशकको लागि चारजना सिफारिस

हेल्थ टुडे,
काठमाडौ,५ मंसिरः चिकित्सा शिक्षा आयोगको निर्देशकको लागि चारजना वरिष्ठ चिकित्सकको नाम सिफारिस गरिएको छ । चारजना निर्देशकको लागि सिफारिस हुनेमा प्रा.डा.रमेशप्रसाद आचार्य, प्रा.डा.संगरत्न बज्राचार्य, प्रा.डा.दिलीप शर्मा र प्रा.डा.रती साह रहेका छन् ।
आयोगले कात्तिक १९ गते सूचना जारी गरी आवश्यक योग्यता पुगेकालाई दरखास्त आह्वान गरेको थियो । ती चार पदको लागि २६ ले निवेदन दिएका आयोगले जनाएको छ ।
तीमध्येबाट चारजनाको सिफारिस भएको आयोग स्रोतले जनाएको छ तर औपचारिक जानकारी सार्वजनिक गरिएको छैन् । राष्ट्रिय चिकित्सा ऐन, २०७५ ले आयोगमा चार निर्देशक पदको व्यवस्था गरेको छ ।
आयोगको सूचनामा निर्देशक पदमा आफ्नो व्यक्तिगत सोच, वैयक्तिक विवरणसहित कात्तिक २१ गतेसम्म विवरण बुझाउन भनेको थियो । ती चार निर्देशनालयमा मापदण्ड तथा प्रत्ययन, योजना समन्वय तथा प्राज्ञिक उन्नयन, परीक्षा निर्देशनालय र नेशनल बोर्ड अफ मेडिकल स्पेसियालिटिज रहेका छन् । ती पदका समयावधि चार वर्षको रहने ऐनमा नै उल्लेख भएको छ ।