हेल्थ टुडे
काठमाडौं, २१ साउन : स्वास्थ्य तथा जनसंख्या मन्त्रीले धनुषाको ढल्केबरमा ट्रमा सेन्टर निर्माण गर्ने सरकारको योजना यथावत् रहेको स्पष्ट पारेका छन्। संघीय संसदमा लहानमा ट्रमा सेन्टर निर्माणको विषय उठाएपछि ढल्केबरको योजना प्रभावित हुने हो कि भन्ने जिज्ञासा बढेपछि मन्त्रीले समाजिक सञ्जाल मार्फत यस्तो स्पष्टिकरण दिएका हुन्।
मन्त्रीका अनुसार ढल्केबरमा ट्रमा सेन्टर निर्माण गर्ने योजना कुनै पनि रूपमा रोकिएको वा परिवर्तन गरिएको छैन। पूर्व–पश्चिम राजमार्ग तथा मधेश प्रदेशलाई जोड्ने प्रमुख सडक सञ्जालको केन्द्रमा रहेको ढल्केबरको भौगोलिक अवस्थिति र बढ्दो दुर्घटनालाई मध्यनजर गर्दै त्यहाँ ट्रमा सेन्टरको आवश्यकता अझै पनि उत्तिकै महत्वपूर्ण रहेको उनले बताएका छन्। मन्त्रालय उक्त योजना कार्यान्वयन गर्न प्रतिबद्ध रहेको पनि उनले उल्लेख गरेका छन्।
उनले संसदमा लहानको सन्दर्भ उठाउनुको उद्देश्य कुनै एक स्थानलाई प्राथमिकता दिएर अर्को स्थानलाई पछाडि पार्ने नभएको स्पष्ट पारे। मधेश प्रदेशका विभिन्न क्षेत्रमा दुर्घटनाको अवस्था, जनघनत्व, स्वास्थ्य सेवामा पहुँच तथा भौगोलिक आवश्यकतालाई आधार बनाएर आवश्यकताअनुसार क्रमशः ट्रमा सेन्टर स्थापना गर्ने सरकारको दीर्घकालीन योजना रहेको उनको भनाइ छ।
स्वास्थ्य सेवा नागरिकको सहज पहुँचमा पु¥याउने, आकस्मिक उपचारलाई प्रभावकारी बनाउने तथा दुर्घटनाबाट हुने मानवीय क्षति न्यूनीकरण गर्ने लक्ष्यसहित मन्त्रालयले आवश्यक अध्ययन, योजना र स्रोत व्यवस्थापनको काम अघि बढाइरहेको मन्त्रीले जानकारी दिएका छन्। साथै, यस विषयमा भ्रममा नपरी तथ्यमा आधारित जानकारीमा विश्वास गर्न उनले सबैमा आग्रह गरेका छन्।
Leave a Reply