एसआरएलको १०औ बार्षिकोत्सव

हेल्थ टुडे,
काठमाडौं : एसआरएल डाइग्नोस्टिक्सले विभिन्न कार्यक्रमको आयोजना गरि आफ्नो १० औं बार्षिकोत्सव मनाएको छ । काठमाडौंको महाराजगन्जस्थित मुख्य कार्यालयमा बुधबार आयोजना गरिएको कार्यक्रममा एसआरएलका प्रबन्ध निर्देशक रबिन्द्रभक्त श्रेष्ठले स्वदेशमै गुणस्तरीय सेवा प्रदान गर्नमा एसआरएल सधै अगाडि रहेको बताउदै दक्ष चिकित्सकको सिफारिस अनुसार समयमै रिपोर्ट उपलब्ध गराउने काममा आफूहरु लागि परेको जानकारी दिए ।
एसआरएलका बजार प्रमुख सन्जिव परासरले कम्पनीले आवश्यकता अनुसार घरघरमा नमुना संकलन गरेर इमेल मार्फत रिपोर्ट पठाउने सुविधा प्रदान गरिरहेको र सेवालाई अझै प्रभावकारी बनाउने योजना रहेको बताए । सेल्स म्यानेजर दीपकराज जोशीले एसआरएलले सर्वधारणको आवश्यकतालाई ध्यानमा राखी विभिन्न समयमा विशेष शिविर आयोजना गरि सर्वसुलभ गुणस्तरीय सेवा प्रदान गर्दै आइरहेको बताए । एसआरएलको देश भित्र र बाहिर गरि ३४२ ल्याव र ७ हजार भन्दा बढी कलेक्सन सेन्टर रहेका छन् । भारत र नेपालको साझेदारीमा बिगत १० बर्ष अगाडि रविभक्त श्रेष्ठ र किशोर भक्त श्रेष्ठको पहलमा एसआरएल स्थापना भएको थियो । यसै गरि अन्तरराष्ट्रिय बाल अधिकार दिवसको अवसरमा बुधबार एसआरएलले इसान बाल तथा महिला अस्पताल लगायत विभिन्न अस्पतालहरुमा चित्रकला प्रतियोगिता आयोजना गरेको छ । प्रतियोगितामा सहभागी बालबालिकालाई पुरस्कृत गरिएको थियो ।