वीर अस्पतालको दुवाकोट परियोजनालाई अघि बढाउन स्वास्थ्यमन्त्रीको निर्देशन

हेल्थ टुडे,
भक्तपुर,१३ मंसिरः स्वास्थ्य तथा जनसंख्यामन्त्री भानुभक्त ढकालले वीर अस्पतालको दुवाकोट परियोजनालाई तत्काल अघि बढाउन निर्देशन दिएका छन् । यसअघि प्राविधिकहरुले अस्पताल बनाउने भनिएको ठाँउको माटो अनुपयुक्त भएको निस्कर्ष निकालेको भन्दै तत्कालिन उपप्रधान एवं स्वास्थ्य मन्त्री उपेन्द्र यादवले परियोजना स्थगित गरेका थिए ।
तर,स्वास्थ्य तथा जनसंख्या मन्त्रालयमा गत आइतबार बसेको मन्त्रालय स्तरीय विकास समाधान समिति बैठकमा चिकित्सा विज्ञान राष्ट्रिय प्रतिष्ठान न्याम्स र वीर अस्पतालका अधिकारीहरुलाई मन्त्री दुवाकोट परियोजना तत्काल अघि बढाउन निर्देशन दिएका छन् । बैठकमा मन्त्री ढकालले भनेः‘यो राष्ट्रिय गौरवको आयोजना हो । वीर अस्पताललाई अन्तराष्ट्रिय स्तरको विशिष्ठकृत सेवा सहितको उत्कृष्ठ केन्द्रको रुपमा विस्तार गर्न सरकारले यो जग्गा छुट्टयाएको हो । त्यसैले यसमा नअल्मलिकन तत्काल परियोजनाको काम अघि बढाउनुसन् ।’
बैठकमा स्वास्थ्य सचिव खगराज बरालले पनि भौगोलिक बनावट अनुसार डिजाइन गर्न सकिने भन्दै परियोजना रोक्न नहुने धारणा राखेका छन् । सरकारले चार वर्षअघि वीर अस्पताललाई भक्तपुरको चाँगुनारायणस्थित दुवाकोटमा ५७० रोपनी जग्गा उपलब्ध गराएर १ हजार ५ सय शैय्याको अन्तर्राष्ट्रिय स्तरको अत्याधुनिक अस्पताल बनाउने निर्णय गरेको थियो ।
कुल ५० अर्व लागतमा निर्माण गरिने सो अस्पतालका लागि चीन सरकारले सहयोग गर्ने घोषणा गरेको थियो । दुवाकोटको उक्त परियोजनाका लागि सरकारले चालु आर्थिक बर्षको बजेटमा ४० करोड रुपैयाँ विनियोजन गरिसकेको छ । गत वर्ष सोही परियोजनाका लागि १५ करोड छुट्याएपनि काम अघि नबढ्दा बजेट फ्रिज भएको थियो ।