अब देशका ७५३ वटै पालिकामा पुग्ने भयो आयुर्वेद सेवा

हेल्थ टुडे,
काठमाडौं, १७ असार : नागरिक आरोग्य कार्यक्रम अब देशका ७५३ वटै पालिकासम्म पुग्ने भएको छ । सरकारले आउँदो आर्थिक वर्षको बजेटमा सबै पालिकामा पुगाउने गरि बजेट विनियोजन भएपछि नयाँ आर्थिक वर्षभित्रै प्रत्येक पालिकामा आयुर्वेद सेवा पुग्ने निश्चित भएको हो ।
स्वास्थ्य तथा जनसंख्या मन्त्रालय आयुर्वेद तथा वैकल्पिक चिकित्सा विभागका निमित्त महानिर्देशक डा. श्यामबाबु यादवले नयाँ आर्थिक वर्षभित्र देशका ७५३ वटै पालिकामा नागरिक आरोग्य कार्यक्रम मार्फत आयुर्वेद सेवा पुग्ने बताउछन् । सरकारले बजेटको सुनिश्चित गरेकाले देश भरिकै आयुर्वेद सेवा विस्तार भएको डा. यादवले जानकारी दिए । यो वर्ष मात्र सरकारले १४४ वटा पालिकामा थप नागरिक आरोग्य कार्यक्रम मार्फत आयुर्वेद सेवा स्थापना गर्न लागेको हो । सरकारले नयाँ बजेटमा हरेक पालिकामा नागरिक आरोग्य कार्यक्रम सञ्चालनका लागि प्रति पालिका पाँच लाख रुपैयाका दरले बजेट विनियोजन गरेको डा. यादवले बताए । आफु विभागको निमित्त महानिर्देशक भएपछि आयुर्वेद र वैकल्पिक चिकित्सा विधालाई प्राथमिकता दिन स्वास्थ्य मन्त्री, योजना आयोगदेखि प्रधानमन्त्री कार्यालयसम्म योजना सहित पुगेको र सबैको सकारात्मक सहयोगका कारण आयुर्वेद क्षेत्र राज्यको प्राथमिकतामा पर्न थालेको महानिर्देशक डा. यादवको अनुभव छ । योग, ध्यान र व्यायामका माध्यमबाट स्वस्थ्य नेपाल बनाउन सकिन्छ भन्ने अभिप्रायले आयुर्वेदको विकासमा सवै पक्षको सकारात्मक सहयोग आवश्यक रहेको डा. यादव बताउछन् ।
डा. यादवले भने,अब आयुर्वेद सेवा प्रत्येक पालिका स्तरमा पाउन सकिन्छ । एक जना कविराज वा बैद्य अव सबै पालिका स्तरमा हुनेछन । र सर्वसाधारणले सहज रुपमा आयुर्वेद सेवा पाउने छन । भविश्यमा देशका सबै वडासम्म आयुर्वेद सेवालाई विस्तार गर्ने गरि आफुले योजना बनाइरहेको र त्यसका लागि स्वास्थ्य मन्त्रालय र सरकारलाई कन्भिन्स गराउनमा आफु लाग्ने यादवको योजना छ । देश संघियतामा गएपछि आयुर्वेद पनि संघीय आरोग्य समिति, प्रादेशिक, जिल्ला, पालिका र वडा स्तरिय आयुर्वेद समिति मार्फत स्थानिय तहसम्म पुगेको दावी गर्दै डा. यादवले निरोगी नेपाल बनाउन आयुर्वेद तथा वैकल्पिक विभागले बालबालिकादेखि जेष्ठ नागरिकको स्वास्थ्य उपचारमा नयाँ कार्यक्रम सञ्चालन गरिरहेको बताए ।