टिचिङका डाक्टरहरुमाथि कुटपिट गर्ने महाराजगञ्ज प्रहरी वृतका डिएसपी लम्साल जिम्मेवारीबाट हटाइए, अन्य प्रहरीलाई पनि कारवाही

हेल्थ टुडे,
काठमाडौं, ४ चैत : लकडाउनका बेला बुधबार साझ ड्युटीबाट फर्किदैं गरेका त्रिवि शिक्षण अस्पतालका तीन जना डाक्टरमाथि कुटपिटमा संलग्न नेपाल प्रहरीको महाराजगञ्ज वृत्तका डिएसपी उमेश लम्साललाई कारवाही गरिएको छ । उनलाई आजैदेखि महाराजगञ्ज वृतको प्रमुखबाट हटाएर रानीपोखरी तानिएको छ । कोभिड–१९ को महामारीमा अंग्रपंक्तिमा खटिने चिकित्सकमाथि लकडाउनका बेला प्रहरीले कुटपिट गरेपछि यो घटनाका बिषयमा चौतर्फी तीब्र विरोध भएको थियो । घटनामा संलग्न प्रहरीलाई कारवाही हुनु पर्ने माग सर्वत्र भएपछि उनलाई जिम्मेवारीबाट हटाइएको हो । नेपाल चिकित्सक संघ लगायतका पेसागत संगठनहरु, मिडिया, चिकित्सकहरु र समाजिक सञ्जालमा समेत दोषीमाथि तत्काल कारवाही हुनु पर्ने आवाज उठेको थियो ।
चौतर्फी विरोध पछि महानगरीय प्रहरी कार्यलयले उनलाई वृत्तको जिम्मेवारीबाट हटाएर महानगरीय प्रहरी कार्यलयमा तानेको महानगरीय प्रहरीका प्रवक्ता श्यामलाल ज्ञवालीले जानकारी दिए । उनकाअनुसार उक्त घटनमा संलग्न अन्य प्रहरीलाई पनि महानगरीय कार्यलयमा तानिएको छ । कार्यलयले यसअघि प्रहरी बरिष्ठ उपरिक्षक किरण ब्रजाचार्यको संयोजकत्वमा प्रहरी उपरिक्षक मुकेश सिंह र प्रहरी नायब उपरिक्षक होबिन्द्र बोगटी रहेको छानविन समिति गठन गरेको थियो ।
घटनाको प्रारम्भिक छानविनमा प्रहरी अधिकारी दोषी देखिएपछि कारवाही गरिएको हो । छानविन अझै सकिएको छैन । बुधबार राति ८ बजेतिर शिक्षण अस्पतालमा ड्युटी सकेर खाना खाएर डेरा तर्फ फर्किरहेको अवस्थामा डा.शम्भु खनाल, डा. तेजप्रसाद साह र डा. विकास शाहलाई लकडाउन उल्लंघन गरेको भन्दैं महानगरी प्रहरी वृत्त महाराजगन्जको टोलीले लाठीचार्ज गरेको थियो । यस क्रममा डाक्टरहरुलाई चोट लागेको थियो । सरकारले उपचारमा चिकित्सकहरुको सुरक्षा गर्ने बताइरहदा उपचारमा संलग्न चिकित्सकहरुले नै प्रहरीबाट कुटाइ खाएका थिए ।