पहिलो पटक कर्णाली प्रदेशको सरकारी अस्पतालमा मिर्गौला प्रत्यारोपण

हेल्थ टुडे,
सुर्खेत, २२ माघ : पहिलो पटक कर्णाली प्रदेशको सुर्खेत स्थित प्रदेश अस्पतालमा मिर्गौला प्रत्यारोपण गरिएको छ । कर्णाली प्रदेश अस्पतालमा पहिलो पटक मिर्गौला प्रत्यारोपण सफल भएको छ । शहीद धर्मभक्त राष्ट्रिय प्रत्यारोपण केन्द्रका प्रत्यारोपण विज्ञ सहितका चिकित्सकहरु र सुर्खेतका चिकित्सकहरूको टोलीले २२ वर्षीय पुरुषमा मिर्गौलाको प्रत्यारोपण गरिएको हो । प्रत्यारोपणको नेतृत्व शहीद धर्मभक्त राष्ट्रिय प्रत्यारोपण केन्द्रका कार्यकारी निर्देशक समेत रहेका अंग प्रत्यारोपण सर्जन डा. पुकारचन्द्र श्रेष्ठले गरेका हुन ।
केन्द्रले सातै प्रदेशमा प्रत्यारोपण सेवा विस्तार गर्ने लक्ष्य अनुसार प्रदेश अस्पतालमा पनि मिर्गौला प्रत्यारोपण सेवा सुरु गरिएको थियो । शहीद धर्मभक्त राष्ट्रिय प्रत्यारोपण केन्दका कार्यकारी निर्देशक डा. श्रेष्ठ र प्रदेश अस्पतालका विशेषज्ञ चिकित्सकसहितको टोलीले बर्दघाट नगरपालिका–४, नवलपरासीका २२ वर्षीय युवाको मिर्गौला सफल प्रत्यारोपण गरेको अस्पतालका निर्देशक डा. डम्बर खड्काले जानकारी दिए ।
आइतबार सेवा विस्तारसम्बन्धी जानकारी दिन आयोजित पत्रकार सम्मेलनमा खड्काले भने, ‘विरामीको संख्या बढ्दो छ । अब कम्तिमा पनि एक महिनामा एक जना बिरामीको मिर्गौला प्रत्यारोपण गरिनेछ ।’
अनुमति पाएको ३ महिनाभित्र मिर्गौला प्रत्यारोपण सुरु गरेको प्रदेश अस्पतालले सेवा नियमित रूपमा सञ्चालन गर्ने जनाएको छ । मिर्गौला प्रत्यारोपण गर्नु परे काठमाडौं नै जानुपर्ने बाध्यताबाट अब कर्णालीका नागरिक मुक्त हुने निर्देशक खड्काको विश्वास छ ।
अब सुर्खेतमा नियमित मिर्गौला प्रत्यारोपण गराउने खड्काले जानकारी दिए । ‘हामीले एउटा ऐतिहासिक कामको सुरुवात गरेका छौं । अब यस क्षेत्रका नागरिकका लागि विशिष्ठ चिकित्सा सेवा थपिएको छ,’ निर्देशक खड्काले भने, ‘प्रत्यारोपण सफल पार्न चिकित्सकहरू धन्यवादका पात्र छन् ।’
शहीद धर्मभक्त राष्ट्रिय प्रत्यारोपण केन्द्रका कार्यकारी निर्दशक डा. श्रेष्ठले देशका सातै प्रदेशमा मिर्गौला प्रत्यारोपण गर्ने कार्यक्रम अनुसार काठमाडौ, पोखरा पछि कर्णाली प्रदेशको सुर्खेमा प्रत्यारोपण सफल भएकोमा खुशी व्यक्त गरेका छन् । डा. श्रेष्ठले भने, ‘ अब सुर्खेतमा पनि प्रत्यारोपण सेवा नियमित हुनेछ, । हामीले सक्दो सहयोग गर्नेछौ । डा. पुकारकै अगुवाईमा शहीद धर्मभक्त राष्ट्रिय प्रत्यारोपण केन्द्रले एक हजार भन्दा बढीमो मिर्गौला प्रत्यारोपण गरिसकेको छ । डा. श्रेष्ठका अनुसार अव निकट भविश्यमै हेटौडा र कोशी अस्पतालमा प्रत्यारोपण सम्पन्न हुने छ ।