स्वास्थ्य तथा जनसंख्या वैज्ञानिकहरुको नवौँ सम्मेलन २८ र २९ चैतमा काठमाडौंमा हुने

हेल्थ टुडे,
काठमाडौँ, २१ चैत : स्वास्थ्य तथा जनसंख्या वैज्ञानिकहरुको नवौ राष्ट्रिय सम्मेलन यही चैत २८ र २९ गते काठमाडौँको माइतीघर स्थित कार्की बैकेटमा हुने भएको छ । नेपाल स्वास्थ्य अनुसन्धान परिषद्को आयोजनामा हुने उक्त सम्मेलनको नारा ‘स्वास्थ्यका लागि अनुसन्धान कार्यान्वयनका लागि तथ्य र अन्वेषण’ रहेको छ ।
नवौं सम्मेलनबारे जानकारी दिन परिषद्ले मंगलबार आयोजना गरेको पत्रकार सम्मेलनमा सदस्य सचिव डा प्रदीप ज्ञवालीले आर्थिक मन्दीका कारण कुनै पनि सभा सम्मेलन नगर्न अर्थ मन्त्रालयले राज्यका सबै निकायलाई परिपत्र गरे पनि परिषद्को नियमित कार्यक्रम भएको भन्दै अनुरोध गरेपछि पुर्व अर्थमन्त्री विष्णु पौडेलले सम्मेलन गर्न बजेट स्विकृत गरेको जानकारी दिए । पूर्व अर्थमन्त्री पौडेलले नै सरकारी खर्च कटौती गर्ने भन्दै सरकारी निकायले तालिम, गोष्ठी र सम्मेलन गर्न नपाउने भनि गत माघमा परिपत्र जारी गरेका थिए । डा. ज्ञवालीले स्वास्थ्य नीति निर्माणमा सहयोग गर्ने किसिमका सुझाव दिन सम्मेलन आयोजना गर्न लागिएको बताए ।
‘ यो वर्ष बिगतका वर्षहरुको तुलनामा कम र गुणस्तरीय अनुसन्धानलाई मात्र समावेश गरिने छ । ’ डा ज्ञवालीले भने ।
उनका अनुसार यो वर्षको सम्मेलनमा १५० वटा कार्यपत्र प्रस्तुतिकरण हुने छन । सम्मेलनका लागि दुईवटा प्लेनरी सेसन र नौ वटा प्यारालाल सेसन रहने बताइएको छ ।