स्वास्थ्य मन्त्री बस्नेत सम्मानित

हेल्थ टुडे,
काठमाडौं, ८ असोज : स्वास्थ्य तथा जनसंख्या मन्त्री मोहनबहादुर बस्नेत सम्मानित भएका छन् । नेपाल फार्मेसी संघले सोमबार राजधानीमा आयोजित विश्व फार्मेसी दिवसको अवसर पारेर मन्त्री बस्नेतलाई सम्मान गरेको हो ।
स्वास्थ्य तथा जनसंख्या मन्त्रालयको जिम्मेवारी सम्हालेपछि मन्त्री बस्नेतले फार्मेसीहरुको अनुगमनलाई तिव्रता दिएको, कानून विपरित चलेका फार्मेसीहरुलाई सजाय गरेको, राम्रा काम गर्नेलाई पुरस्कृत गर्ने परिपाटीको विकास गरेको, फार्मेसीका क्षेत्रमा जनचेतना बिस्तार गरेको र समग्र फार्मेसी क्षेत्रको मनोवल उच्च राख्ने जस्ता उल्लेखनिय काम गरेकोले संघले बस्नेतलाई सम्मान गरेको हो । नेपाल फार्मेसी संघका अध्यक्ष किरण ढकाल सहित फार्मेसी क्षेत्रका अगुवा व्यक्तित्वहरुले मन्त्री बस्नेतलाई सम्मान पत्रबाट सम्मानित गरेको थियो ।
मन्त्री बस्नेतले आफु मन्त्री पद सम्हाले देखि नै फार्मेसीहरुलाई कानून सम्मत ढंगले सञ्चालन गर्न आग्रह गर्दै अनुगमन र निरिक्षणलाई जोड दिदै आइरहेका छन । मन्त्री बस्नेतकै निर्देशनमा गत महिना औषधि व्यवस्था विभागको नेतृत्वमा देशै भरि एक साथ फार्मेसीहरुको कडा अनुगमन भएको थियो । उपत्यकामा मात्र एकै दिन १०१ फार्मेसीको अनुगमन भएको थियो । जसमध्ये १० वटा फार्मेसीलाई कारवाही गरिएको थियो । त्यसपछिका दिनमा पनि मन्त्री बस्नेतकै निर्देशन र सक्रियतामा औषधि व्यवस्था विभागले अनुगमनलाई निरन्तरता दिदै आइरहेको छ । देश भरि अहिले ३० हजार भन्दा बढी फार्मेसी सञ्चालनमा रहेका छन् ।