प्रथम राष्ट्रिय प्रत्यारोपण सम्मेलन पुष ७ गते काठमाडौंमा हुने

हेल्थ टुडे,
काठमाडौं, ४ पुष : नेपालमा पहिलो पटक यही पुष ७ गते राष्ट्रिय प्रत्यारोपण सम्मेलन आयोजना हुने भएको छ । शहीद धर्मभक्त राष्ट्रिय प्रत्यारोपण केन्द्र, भक्तपुर र अंग प्रत्यारोपण समाज नेपालको संयुक्त आयोजनामा काठमाडौंमा आयोजना हुने सम्मेलनको उद्घाटन प्रधानमन्त्री पुष्पकमल दाहालले गर्ने भएका छन् । सम्मेलनमा अंग प्रत्यारोपणका क्षेत्रमा ख्याति कमाएका र अनुभवी विज्ञहरु, नीति निर्माता र कानून कार्यन्वयनमा संलग्न विज्ञहरु सहभागी हुने आयोजक शहीद धर्मभक्त राष्ट्रिय प्रत्यारोपण केन्द्र, भक्तपुरका कार्यकारी निर्देशक एवं वष्ठि अंग प्रत्यारोपण विज्ञ डा. पुकारचन्द्र श्रेष्ठले जानकारी दिए ।
डा.श्रेष्ठका अनुसार सम्मेलनमा मस्तिष्क मृत्यु पश्चात हुने अंगदान र प्रत्यारोपण सम्बन्धी नविनतम प्रविधिका बिषयमा पनि गम्भिर बहस हुने छ । केन्द्रले यो भन्दा पहिले दुई पटक अन्तर्राष्ट्रिय सम्मेलन सम्पन्न गरिसकेको छ । यो पटक राष्ट्रिय प्रत्यारोपण सम्मेलन गर्न लागिएको हो । पहिलो पटक कलेजो प्रत्यारोपणको सुभारम्भ गर्दै केन्द्रले कलेजो प्रत्यारोपणका साथै नेपालमा सबै भन्दा बढी मिर्गौला प्रत्यारोपण गर्ने विश्वसनिय केन्द्रका रुपमा आफुलाई उभ्याएको छ । केन्द्रले अहिलेसम्म १२ सय भन्दा बढीको मिर्गौला प्रत्यारोपण गरिरहेको छ ।