पर्साका सिडिओ अर्याललाई जिम्मेवारीमुक्त गर्न गृह मन्त्रीलाई चिकित्सक संघको आग्रह

हेल्थ टुडे,
काठमाडौं, ४ मंसिर : नेपाल चिकित्सक संघले पर्साका प्रमुख जिल्ला अधिकारी (सिडिओ) गणेश अर्याललाई जिम्मेवारीमुक्त गर्न गृह मन्त्री रमेश लेखकलाई आग्रह गरेको छ । संघका अध्यक्ष डा. अनिल विक्रम कार्की र महासचिव डा. सन्जिव तिवारीले गृह मन्त्री लेखकलाई भेटेर ज्ञापन पत्र बुझाउदै पर्साका सिडिओ अर्यालले कानून विपरित गैरजिम्मेवारपूर्ण अभिव्यक्ति दिएर चिकित्सा पेसामाथि नै घात गरेको आरोप लगाएको छ । सिडिओ अर्याललाई तत्काल कारवाही नगरिए देश भरिका चिकित्सक आन्दोलनमा उत्रने चेतावनी समेत संघले दिएको छ । सिडिओ अर्यालले केही दिन पहिले आम्दा अस्पतालको घटनाका बिषयमा सार्वजनिक कार्यक्रममा गैरजिम्मेवारपूर्ण अभिव्यक्ति दिएर चिकित्सक पेसामाथि धावा बोलेको संघको ठहर छ । कानून पालना गराउने निकायको प्रमुख व्यक्तिले आम्दा अस्पतालमा घटेको घटनाका बिषयमा घटनालाई उत्तेजित बनाउने अभिव्यक्ति दिएर रक्षक र भक्षक भएको उदाहरण प्रस्तुत गरेकोले तत्काल कारवाही गर्न संघले जोडदार माग गरेको छ । अर्याल जस्ता सिडिओका कारण चिकित्सक र स्वास्थ्य संस्थामाथि आकर्मणका घटना बढी रहेको संघले दावी गरेको छ ।