विश्व मिर्गौला दिवसमा वरिष्ठ अंग प्रत्यारोपण विज्ञ डा. पुकारचन्द्र श्रेष्ठ सम्मानित

हेल्थ टुडे,
काठमाडौं, २८ फागुन : शहीद धर्मभक्त राष्ट्रिय प्रत्यारोपण केन्द्र भक्तपुरका कार्यकारी निर्देशक समेत रहेका वरिष्ठ अंग प्रत्यारोपण विज्ञ डा. पुकारचन्द्र श्रेष्ठ सम्मानित भएका छन् । विश्व मिर्गौला दिवसको अवसरमा बुधबार ललितपुरमा आयोजित पन्ध्रौ नेपाल प्रत्यारोपण खेलकुद एवं सांगितिक कार्यक्रममा मिर्गौला प्रत्यारोपी समाजका तर्फबाट स्वास्थ्य तथा जनसंख्या मन्त्री प्रदीप पौडेलले डा. श्रेष्ठलाई सम्मान गरेका हुन । नेपालमा सबै भन्दा बढी मिर्गौला प्रत्यारोपण गर्ने सर्जनको रुपमा चिनिएका डा. पुकारले नेपालमा मात्र करिव १४ सय जनाको सफल मिर्गौला प्रत्यारोपण गरेका छन् । नेपालमा पहिलो पटक कलेजो प्रत्यारोपण सेवा सुरु गराएर डा. पुकारले अर्को ऐतिहासिक काम गरेका छन् ।
कार्यक्रममा स्वास्थ्य तथा जनसंख्या मन्त्री पौडेलले मिर्गौला र कलेजो प्रत्यारोपणका क्षेत्रमा डा. पुकार र उहाँले नेतृत्व गरेको शहीद धर्मभक्त राष्ट्रिय प्रत्यारोपण केन्द्र भक्तपुरले उत्कृष्ठ काम गरेको बताउदै मिर्गौला प्रत्यारोपीका समस्या समाधानका लागि सरकारले सक्दो सहयोग गर्ने आश्वासन दिए । मन्त्री पौडेलले केन्द्रले उपचारात्मक सेवासँगै जनचेतनामूलक कार्यक्रमपनि सञ्चालन गर्नु पर्नेमा जोड दिए । केन्द्रका कार्यकारी निर्देशक डा. श्रेष्ठले केन्द्रले उपचारात्मकसँगै जनचेतनामूलक कार्यक्रम पनि बेला बेलामा सञ्चालन गर्दै आइरहेको जानकारी दिए । कार्यक्रममा विभिन्न सांगितिक कार्यक्रम पनि आयोजना गरिएको थियो । कार्यक्रममा खेलकुद मन्त्री तुजुलाल चौधरी पनि सहभागि थिए । बुधबमर विहान पाटन दरवारस्क्वायरबाट सुरु भएको जनचेतनामूकल र्याली लगनखेलमा आएर कार्यक्रममा समाहित भएको थियो ।