प्रधानमन्त्री ओलीको स्वास्थ्यमा उल्लेख्य सुधार, केही दिन अझै अस्पतालमै रहने

हेल्थ टुडे,
काठमाडौ,१२ मंसिरः प्रधानमन्त्री केपी शर्मा ओलीको स्वास्थ्यमा बुधबार उल्लेख्य सुधार आएको चिकित्सकले बताएका छन् । स्वास्थ्यमा सुधार देखिएपनि पूर्ण रुपले खतरामुक्त नरहेकाले अझै केही दिन अस्पतालमै राखिने उपचारमा संलग्न चिकित्सकले जनाएका छन् । अत्यधिक पेट दुखाई भएपछि प्रधानमन्त्री ओली मंगलबार बिहान मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना भएका थिए ।
उपचारमा संलग्न चिकित्सकका अनुसार एपेन्डिसाइटिसको आकस्मिक शल्यक्रियासँगै ओलीको पेटमा फैलिएको संक्रमण नियन्त्रण गरिएको भएपनि अन्य संक्रमणको जोखिम यथावत् छ । उपचारमा संलग्न चिकित्सकले अहिले एन्टिबायोटिक दिएर संक्रमण नियन्त्रण गर्ने प्रयास भईरहेको जनाएका छन् । प्रधानमन्त्रीको शल्यक्रिया गरिएको मनमोहन कार्डियोथोरासिक भास्कुलर तथा ट्रान्सप्लान्ट सेन्टरका कार्यकारी निर्देशक प्रा.डा.उत्तमकृष्ण श्रेष्ठले बुधबार राति ७ बजे विज्ञप्ति जारी गर्दै प्रधानमन्त्रीको स्वास्थ्यमा उल्लेख्य सुधार भइरहेको जनाएका छन् । ओलीलाई उपचारका सबै व्यवस्थासहित निरन्तर निगरानीमा राखिएको विज्ञप्तिमा उल्लेख छ ।
त्यसअघि बिहान साढे १० बजे सेन्टरले जारी गरेको विज्ञप्तिमा प्रधानमन्त्री कुराकानी गर्न सक्ने अवस्थामा रहेको जनाइएको थियो । प्रधानमन्त्रीको मंगलबार ल्यापरोक्टोमी (पेटलाई पूरा चिरेर गरिने शल्यक्रिया) र एपेन्डेक्टोमी (एपेन्डिक्स हटाउने शल्यक्रिया) गरिएको थियो । जोखिम कम भएपछि प्रधानमन्त्रीलाई बुधबार बिहान भेन्टिलेटरबाट हटाइएको थियो ।
ओलीलाई हाल‘बोर्ड स्प्रेक्टम एन्टिबायोटिक (विभिन्न संक्रमणमा प्रभावकारी हुने औषधि) दिइएको छ । मल्टिड्रग रेसिस्टेन्ट (बहुऔषधि प्रतिरोधी) अवस्था आइपरे यस्तो औषधि एक साताभन्दा बढी समय दिनुपर्न सक्ने ती चिकित्सकले जनाए । प्रधानमन्त्रीलाई बुधबार तरल पदार्थ मात्र खान दिइएको थियो ।प्रधानमन्त्री ओलीलाई आज(बिहिबार) केहिबेर हिडडुल गराईने उपचारमा संलग्न चिकित्सकले जनाएका छन् ।