डा.लोचनको लिए दोब्बर अग्रता

हेल्थ टुडे,
काठमाडौं, २६ माघ : नेपाल चिकित्सक संघको नयाँ नेतृत्वका लागि भएको मतदानको मतगणना जारी छ । उपत्यका बाहिरका मत गणना सकेर अहिले उपत्यकाको मत गणना भइरहेको छ । डा. लोचन कार्की नेतृत्वको लोकतान्त्रिक समूह र डा. पुष्पमणी खराल नेतृत्वको पेसागत समावेशी समूहबिच भइरहेको प्रतिस्पर्धामा डा. कार्की नेतृत्वको लोकतान्त्रिक समूहले आफ्नो अग्रता अझ फराकिलो बनाउदै लगेको छ । डा. कार्कीले डा. खरालको भन्दा झण्डै दोब्बर मत प्राप्त गरिसकेका छन । ६ हजार एक सय ५० मत खसेकोमा अहिलेसम्म ३ हजार २ सय २२ मत गणना भइसकेको छ । त्यसमध्ये अध्यक्षका प्रत्यासी डा. कार्कीले २ हजार एकसय ११ मत पाएका छन भने डा. खरालले एक हजार ७६ मत पाएका छन् । वरिष्ठ उपाध्यक्षमा खराल समूहकी डा. रक्षा श्रेष्ठले ११ सय ७१ मत पाएकी छन भने कार्की समूहका डा. शिबप्रसाद श्रेष्ठले १८ सय ८९ मत पाएका छन । उपाध्यक्षमा डा. अनिल कार्कीले २ हजार ७० मत ल्याउदा डा. रन्जित झाले एक हजार ३३ मत पाएका छन् । महासचिवमा ४ जना बिच प्रतिस्पर्धा छ । लोकतान्त्रिक समूहका डा. बद्री रिजाल १२ सय २४ मतका साथ सबैभन्दा अगाडि छन । त्यसपछि पेसागत समावेशी समूहका डा. मधुर बस्नेतले ८ सय मत पाएका छन भने स्वतन्त्र उम्मेदवार डा. दीपेन्द्र पाण्डेले ५९४ र डा. अजय मिश्रले ५१६ मत पाएका छन । कोषाध्यक्षमा डा. प्रकाश बुढाथोकीले अग्रता लिएका छन । त्यसैगरि सहकोषाध्यक्ष सहित सदस्यहरुमा पनि लोकतान्त्रिक समूहले नै अग्रता लिएको छ । दुई दिन भित्र मत गणना सकिने निर्वाचन प्रमुख डा. बाबुराम मरासिनीले बताएका छन ।