चिकित्सक संघको अध्यक्षमा डा. लोचन कार्कीको जित, औपचारिक घोषणा मत गणना सकिएपछि भोली

हेल्थ टुडे,
काठमाडौं, २७ माघ : नेपाल चिकित्सक संघको अध्यक्षमा लोकतान्त्रिक समूहका डा. लोचन कार्कीको जित भएको छ । कुल खसेको मतको ५० प्रतिशतभन्दा बढी मत डा.कार्कीले प्राप्त गरिसकेकाले उनको जित निश्चित भएको हो । यसको औपचारिक घोषणा भने भोली मतगणना सम्पन्न भएपछि गरिने छ । अहिले पनि मत गणना जारी छ । संघको नयाँ नेतृत्वका लागि देशभरिबाट कुल ६ हजार एकसय ५२ मत खसेको थियो । दुई जना मात्र अध्यक्षमा प्रत्यासी रहेकाले ३ हजार ७६ मत प्राप्त गर्नेले बियज हुने अवस्था थियो । करिव १४ सय मत गणना हुन बाकी छदै डा लोचनले जितका लागि आवश्यक भन्दा बढी मत प्राप्त गरिसकेकाले उनको जित शुनिश्चित भएको हो ।
प्रमुख निर्वाचन आयुक्त डा. बाबुराम मरासिनीले ४ हजार ७ सय ८५ मत गणना हुँदा डा. कार्कीले ३ हजार १ सय ९८ मत प्राप्त गरेको र यो खसेको मतको ५० प्रतिशतभन्दा बढी मत भएको बताए ।
उनका प्रतिद्वन्द्वी प्रगतिशिल समूहका डा.पुष्पमणि खरालले १ हजार ५ सय ३५ मत प्राप्त गरेका छन् ।
त्यस्तै उपाध्यक्ष डा. अनिलविक्रम कार्कीले पनि आधाभन्दा बढी ३०८५ मत प्राप्त गरेका छन् भने उनका प्रतिद्वन्द्वी डा. रञ्जीतकुमार झाले १५२४ मत प्राप्त गरेका छन् ।
यो २८ औं कार्यकारिणी समितिको निर्वाचनमा डा. कार्की लगायत सबै पदाधिकारी र अधिकांश सदस्यहरु उनकै प्यानलबाट अग्रता लिइरहेका छन् । मत गणना भोलीसम्म सकिने निर्वाचन मण्डलका सदस्यहरुले जानकारी दिएका छन् । डा. कार्की चिकित्सक संघका महासचिव हुन ।