उदयपुरमा मात्र २ हजार भन्दा बढीको पिसिआर परिक्षण गरिने

हेल्थ टुडे,
काठमाडौं, १२ बैसाख : पछिल्ला दुई हप्तामा उदयपुरको भुल्केका २८ जनामा कोरोना संक्रमण देखिएपछि यहाँका र सदरमुकाम गाईघाट बजार क्षेत्रका वासिन्दाको गरि दुई हजार भन्दा बढीको पिसिआर विधिबाट नमुना परिक्षण गरिने भएको छ । स्वास्थ्य तथा जनसंख्या मन्त्रालयको सहयोगमा उदयपुरका शंकास्पद दुई हजारभन्दा बढीको पिसिआरबाट कोरोनाको नमुना परिक्षण गर्न लागिएको त्रियुगा नगरपालिकाका मेयर बलदेव चौधरीले जानकारी दिए । केन्द्र सरकारले पनि उदयपुरलाई जोखिममा राखेको र दिनप्रतिदिन नयाँ केसहरु देखिन थालेपछि बढी से बढीको परिक्षण गर्न लागिएको उनले बताए । सुरुमा दुई सय ५० जनाको परिक्षण गरिने र त्यसको नतिजा आएपछि थप दुई हजार जनाको परिक्षण गर्ने गरि काम अगाडि बढाइएको मेयर चौधरीले जानकारी दिए । भुल्के बाहेक सदरमुकाम गाईघाट बजार क्षेत्रका वासिन्दाको पनि परिक्षण गरिने छ ।
२८ जनामा संक्रमण देखिएको भुल्के गाईघाट बजारबाट ३ किलोमिटर दूरीमा पर्छ । संक्रमितहरुले गाईघाट बजार आवतजावत गरेको थाहा भएकाले गाईघाटका बासिन्दालाई पनि जोखिममा राखेर परिक्षणको दर बढाइएको मेयर चौधरीको भनाई छ । गत हप्ता भुल्केको एक मस्जिदमा रहेका १६ जनामध्ये १२ जनालाई कोरोना संक्रमण देखिएको थियो । त्यसको भोलीपल्ट थप चार जनामा पनि संक्रमण पुष्टि भएको थियो । त्यसपछि समुदायस्तरमा पनि फैलिएको हुनसक्ने भन्दै झन्डै साढे ४ सयको परीक्षण गर्दा थप १२ जनामा संक्रमण देखिएको छ । संक्रमित भन्दा आधा भन्दा बढी भारतिय नागरिक छन् । संक्रमित सबैको विराटनगरस्थित कोराना विशेष अस्पतालमा राखेर उपचार भइरहको छ । स्वास्थ्य तथा जनसंख्या मन्त्रालयका प्रमुख बिशेषज्ञ डा. रोशन पोखरेले मन्त्रालयले उच्च जोखिम देखिएको उदयपुरलाई प्राथमिकतामा राखेर खोजपड्ताल र परिक्षणलाई प्राथमिता दिएर काम गरिरहेको बताएका छन । नेपालमा सबै भन्दा बढी संक्रमित देखिएको जिल्ला उदयपुर हो । अहिलेसम्म देखिएका ४८ जना संक्रमित मध्ये २८ जना उदयपुरका छन । ४८ जना मध्ये १० जना निको भएर घर फर्किसकेका छन । सरकारले अहिलेसम्म करिब ४४ हजारको कोरोना परिक्षण गरिसकेको जनाएको छ ।