कोभिड–१९ विरुद्धको खोप इन्डियन एयरलाइन्सको विमानबाट आज १२ बजे काठमाडौं आइपुग्दै 

हेल्थ टुडे,

काठमाडौं, ८ माघ  : बहुप्रतिक्षित कोभिड–१९ विरुद्धको खोप कोभिसिल्ड आज भारतबाट दिउँसो १२ बजे काठमाडौं आइपुग्ने भएको छ । भारत सरकारले अनुदानमा उपलब्ध गराएको १० लाख मात्रा कोभिसिल्ड इन्डियन एयरलाइन्सको विमानबाट पहिलो पटक नेपाल ल्याउन लागिएको हो ।

काठमाडौंस्थित त्रिभुवन अन्तराष्ट्रिय विमानस्थलमा खोप  आइपुगेपछि नेपालका लागि भारतीय राजदूत विनयमोहन क्वात्राले स्वास्थ्य तथा जनसंख्या मन्त्री हृदयेश त्रिपाठीलाई हस्तान्तरण गर्ने छन । त्यसपछि उक्त खोप टेकूस्थित राष्ट्रिय खोप भण्डारणमा लगिने छ । स्वास्थ्य सेवा विभागका महानिर्देशक डा. दीपेन्द्ररमण सिंहले कोभिसिल्ड पहिलो चरणमा स्वास्थ्यकर्मी, सुरक्षाकर्मी, सफाइकर्मी, एम्बुलेन्स चालक र शव व्यवस्थापनमा संलग्न व्यक्तिलाई दिइने बताए ।

कोभिसिल्ड खोप उत्पादक सिरम इन्स्टिच्युट अफ इन्डियाका अनुसार लामो सुरक्षाका लागि यो खोपको दुई मात्रा दिन आवश्यक छ ।  यो खोप ३ महिनासम्म ९० प्रतिशत प्रभावकारी हुने बताइएको छ । स्वास्थ्य तथा जनसंख्या मन्त्री हृदयेश त्रिपाठीले एक हप्ताभित्र सबै जिल्लामा खोप लगाउन सकिने गरि काम भइरहेको बताए ।