अहिलेसम्मकै धेरै, एकै दिन ८ हजार ८४८ले जिते कोरोना, मृत्यु हुनेको संख्या पनि घट्यो

हेल्थ टुडे,

काठमाडौं, ८ जेठ : पछिल्लो २४ घण्टामा कोरोना संक्रमित हुनेको संख्या भन्दा निको हुनेको संख्या बढेको छ ।  स्वास्थ्य तथा जनसंख्या मन्त्रालयले शनिबार सार्वजनिक गरेको विवरण अनुसार पछिल्लो २४ घण्टामा ८ हजार ८४८ जना कोरोना भाइरस संक्रमणमुक्त भएका छन् ।      यो संख्या २४ घण्टामा संक्रमणमुक्त हुने अहिलेसम्मकै धेरै संख्या हो । यसअघि शुक्रबार ७ हजार ८९० जना कोरोना संक्रमणमुक्त भएका थिए ।

मन्त्रालयका अनुसार पछिल्लो २४ घण्टामा ८ हजार ५९१ जनामा कोरोना भाइरस संक्रमण पुष्टि भएको छ । २४ घण्टामा कोरोना भाइरस संक्रमणबाट १२९ जनाको मृत्यु भएको छ । पछिल्ला दिनमा कोरोना संक्रमणका कारण मृत्यु हुनेको संख्या पनि कम हुनै गइरहेको छ । शुक्रबार १७७ को ज्यान गएको थियो भने बिहीबार १९० को मृत्यु भएको थियो ।