दोश्रो अन्तराष्ट्रिय प्रत्यारोपण सम्मेलन कार्तिक २६ र २७ काठमाडौंमा हुने

हेल्थ टुडे,
काठमाडौं, १ कार्तिक : दोश्रो अन्तराष्ट्रिय प्रत्यारोपण सम्मेलन यही कार्तिक २६ र २७ गते काठमाडौंमा हुने हुने भएको छ । अंग प्रत्यारोपण समाज नेपाल र शहीद धर्मभक्त राष्ट्रिय प्रत्यारोपण केन्द्र, भक्तपुरको संयुक्त आयोजनामा काठमाडौंको एभरेष्ट होटेलमा सम्मेलन आयोजना हुने छ । सम्मेलनको नारा ‘विकासोन्मुख विश्वका लागि मृतक अंगदाताबाट प्रत्यारोपण ’ रहेको छ ।
सम्मेलनमा अमेरिका, बेलायत, स्पेन, जापान, सिंगापुर र भारत लगायत देशका अंग प्रत्यारोपण विज्ञहरु सहभागी हुने आयोजक अंग प्रत्यारोपण समाज नेपालका अध्यक्ष डा.पुकारचन्द्र श्रेष्ठले जानकारी दिए । सम्मेलनलाई भव्य रुपमा सम्पन्न गर्न आयोजकले विभिन्न समिति बनाएको छ । अंग प्रत्यारोपण समाज नेपालका अध्यक्ष समेत रहेका वरिष्ठ अंग प्रत्यारोपण सर्जन डा. पुकारचन्द्र श्रेष्ठको नेतृत्वमा सम्मेलन आयोजक कमिटि गठन गरिएको छ भने वरिष्ठ सर्जन प्रा. डा. राकेश बर्माको अध्यक्षतामा बैज्ञानिक समिति गठन गरिएको छ । त्यसैगरि मिर्गौला रोग बिज्ञ डा.कल्पना श्रेष्ठको अध्यक्षतामा आथित्य सत्कार समिति, डा. लुसन सिंहको संयोजकत्वमा प्रकाशन समिति, डा. किरणजंग कुवरलाई सम्मेलन आयोजक कमिटिको सचिवको जिम्मेवारी दिइएको छ भने डा. दिपेश श्रेष्ठलाई कोषाध्यक्षको जिम्मेवारी सुम्पिएको छ । सम्मेलनमा अंग प्रत्यारोपण सम्बन्धी दर्जनौ अनुसन्धानमुलक कार्यपत्र प्रस्तुत हुने छन् । प्रस्तुत गरिने कार्यपत्र र अनुभव आदान प्रदानले अंग प्रत्यारोपणको क्षेत्रमा नयाँ ज्ञान र सिपको विकाश हुने अपेक्षा गरिएको आयोजक कमिटि अध्यक्ष डा. श्रेष्ठले बताए ।