४२ दिनमा निवर्तमान स्वास्थ्यमन्त्रीको एउटै काम ‘वीर अस्पतालको निर्देशक हटाएर आफू निकटलाई नियुक्ति’

हेल्थ टुडे,
काठमाडौं, १६ फागुन : स्वास्थ्य तथा जनसंख्या मन्त्रीको पदबाट हटैकै दिन अर्थात् फागुन १५ गते स्वास्थ्य सेवा दिवसको कार्यक्रममा सभागृहमा निवर्तमान स्वास्थ्य तथा जनसंख्यामन्त्री पदम गिरी स्वास्थ्यका अधिकारीहरूको अघिल्तिर मञ्चमा उभिएर गफ दिइरहेका थिए, ‘मैले मन्त्री भएपछि कुनै पनि कर्मचारीको सरुवामा रुचि देखाइन । चेसको गोटी चलाए झै काम गरिरहेका कर्मचारी हटाएर नयाँ ल्याउँदैमा कुनै परिवर्तन हँुदैन ।’ उनको भाषण सुनेर स्वास्थ्यका अधिकारी हाँसी रहेका थिए । उनकै अगाडि बसिरहेका थिए वीर अस्पतालका पूर्वप्रमुख कार्यकारी एवं निर्देशक डा. भूपेन्द्र बस्नेत । उनै डा. बस्नेतलाई बिना कारण दुई हप्ता अगाडि हटाएर आफू निकट डा.सन्तोष पौडेललाई निर्वतमान स्वास्थ्यमन्त्री गिरीले नियुक्त गरेका थिए । वीर अस्पतालको गहन ढंगले समस्या बुझेका र समाधानका लागि तल्लीन डा. बस्नेतलाई हटाएर गिरीले गत महिनामात्र नेपाल चिकित्सक संघको निर्वाचनमा एमाले निकट प्रगतिशील समूहबाट अध्यक्षमा चुनाव लडेर हारेका डा. पौडेललाई नियुक्त गरेका थिए ।
वीरमा राम्रो काम गरिरहेकाले डा. बस्नेतलाई हटाउने पक्षमा चिकित्सा विज्ञान राष्ट्रिय प्रतिष्ठान (न्याम्स) का उपकुलपति डा. डीएन शाह थिएनन् । किनकी वीरलाई राम्रोसँग बुझेका डा. बस्नेत जत्तिको अर्को चिकित्सक छैन् भन्ने यनलाई थाहा थियो । तर निवर्तमान मन्त्री गिरीले डा. बस्नेतलाई हटाउन सिफारिस नगरे तपाईंलाई पनि हटाउने अवस्था आउन सक्ने भन्दै उपकुलपति डा. शाहलाई धम्क्याए पछि उपकुलपतिले सिफारिस गरेका थिए । डा. बस्नेत सञ्चो नभएर घर बिदामा बसिरहेको बेला छापामार शैलीमा वीरको निर्देशक र प्रमुख कार्यकारीबाट डा. बस्नेतलाई हटाएपछि डा. पौडेललाई निर्देशक नियुक्त गरेका हुन् । यसअघि ट्रमा सेन्टरको निर्देशक हुँदा विवादमा परेका डा. पौडेललाई अहिले गिरीले नै घुमाउरो पारामा प्रमुख कार्यकारीको समेत जिम्मेवारी सम्हाल्ने गरी तोकेका छन् । जवकि वीरको कार्यकारी हुन डा. पौडेलको योग्यताले मिल्दैन । उनलाई अहिले प्रमुख कार्यकारीको जिम्मेवारी समेत हेर्ने गरी कार्यभार तोकिएको छ । प्रमुख कार्यकारीका लागि १२औं तहको चिकित्सक हुनुपर्छ । तर डा. पौडेल दसौं तहका सहप्राध्यापक मात्र हुन् । नियम विपरीत प्रमुख कार्यकारीको जिम्मेवारी दिइएको भन्दै वीरका चिकित्सक, कर्मचारी र स्वास्थ्यकर्मीले विरोध जनाएका छन् ।
वीर अस्पतालका एक वरिष्ठ कन्सल्टेन्ट भन्छन्, ‘निवर्तमान स्वास्थ्य मन्त्री गिरीले ४२ दिनमा गरेको एउटै काम हो, वीरमा नियमविपरीत निर्देशक नियक्त गर्नु । उहाँले केही पनि गर्न सक्नु भएन । ’
स्वास्थ्य सेवा दिवसको दिन उनले आधा घण्टाभन्दा बढी समय स्वास्थ्य प्रणाली सुधारका लागि गफ दिए । दर्शक दीर्घामा रहेका स्वास्थ्य मन्त्रालयका अधिकारीले मनोरञ्जन लिए । स्वास्थ्य बिमा कार्यक्रम अब एक लाखबाट बढाएर पाँच लाखको बनाउनेसम्मका गफ सुने पछि स्वास्थ्य सेवा विभागका एक कर्मचारीले भने, ‘बिमा गरेबापत एक लाखको भुक्तानी त गर्न सकिरहेको अवस्था छैन । यिनका गफ कस्ले पत्याउँछ अब । ’
नभन्दै गफ दिएर बाहिर निस्कन नपाउँदै एमालेले सरकारबाट हट्ने निर्णय गरिसकेको थियो । उनी निन्याउरो अनुहार लगाउँदै मन्त्रालयतिर हानिए ।