डब्लूएचओको दक्षिण पूर्वी एसिया क्षेत्रको निर्देशकमा नेपालका आचार्यको उम्मेदवारी

हेल्थ टुडे,
काठमाडौं, २२ साउन : विश्व स्वास्थ्य संगठन (डब्लूएचओ) को दक्षिण पूर्वी एसिया क्षेत्रको क्षेत्रीय निर्देशकमा नेपालको तर्फबाट शम्भुप्रसाद आचार्यले उम्मेदवारी दिएका छन् । नेपाल सरकारको निर्णय अनुसार आचार्यले उक्त पदमा उम्मेदवारी दिएका हुन् । नेपाल सरकारले २०२३, जुन २३ मा डब्लूएचओलाई पत्राचार गर्दै नेपालको तर्फबाट क्षेत्रीय निर्देशकको पदमा आचार्यको उम्मेदवारी दिएको हो ।
डब्लूएचओले सन् २०२३ अप्रिल २१ मा उक्त पदको उम्मेदवारीको लागि दक्षिण(पूर्वी एसिया क्षेत्रका मुलुकहरुलाई पत्राचार गरेको थियो । त्यसको दुई महिनापछि नेपालले आफ्नो उम्मेदवारी प्रस्तुत गरेको हो ।
उक्त क्षेत्रीय निर्देशक पदको लागि आचार्यसँगै बंगलादेशबाट साइमा वाजेद होसनको पनि उम्मेदवारी परेको छ ।
आगामी अक्टोबर ३० देखि नोभेम्बर २ सम्म हुने डब्लूएचओको क्षेत्रीय समिति बैठक हुनेछ । अक्टोबर ३१ मा उक्त पदका लागि निर्वाचन हुनेछ । जसमा ११ सदस्य मुलुकका स्वास्थ्यमन्त्रीहरू सहभागिता रहनेछ ।
आचार्यसँग जनस्वास्थ्यको क्षेत्रमा तीन दशकभन्दा बढी काम गरेको अनुभव छ । उनले नेपाल, एसियाका विभिन्न क्षेत्र र विश्वस्तरमा समेत स्वास्थ्य क्षेत्रमा नीति, रणनीति, बहुपक्षीय सहकार्य र अन्तर्राष्ट्रिय रुपमा सुधारका काम गर्दै आइरहेका छन् । उनले यसअघि डब्लूएचओबाट निर्देशकका रुपमा नेपाललाई सहयोग गर्ने र यूएनको प्रणालीसँग सहकार्य गर्ने काम गरिसकेका छन् ।
क्षेत्रीय निर्देशक अवधि चार वर्षको हुनेछ । यसभन्दा अगाडि डा। महेन्द्रराज पाण्डे र जनस्वास्थ्य विज्ञ डा। रीता थापाले क्षेत्रीय निर्देशकमा उम्मेदवारी दिएका थिए । आचार्यलाई जिताउन डा। जनस्वास्थ्यविद् डा. बाबुराम मरासिनी पूरै सरकारको संयत्र लागेर काम गर्नुपर्ने बताउँछन् ।
‘डब्लूएचओ को दक्षिण पूर्वी एसिया क्षेत्रको क्षेत्रीय निर्देशकमा नियुक्ति हुँदा नेपालको ठूलो गरिमा बढ्छ । अप्रत्यक्ष रुपमा धेरै फाइदा हुन्छ,’ डा। मरासिनीले भने, ‘हाम्रो उम्मेदवारलाई जसरी भएपनि जित्ताउँछौ भनेर सरकार नै लाग्नुपर्छ ।’
नेपाल विश्वव्यापी बाल स्वास्थ्यमा एक उदाहरणीय देश भएकाले मातृ मृत्युदर र प्रजनन क्षमतालगायतका विषयमा उदाहरणका रूपमा नेतृत्व गर्नेसक्ने जनस्वास्थ्यविद् बताउँछन् ।
डब्लूएचओको दक्षिण(पूर्वी एसिया क्षेत्रको स्थापना सन् १९४८ मा भएको छ । यसले ११ सदस्य मुलुकहरुमा सार्वजनिक स्वास्थ्यको क्षेत्रमा प्राविधिक सहयोग र सहकार्य गर्ने काम गर्छ । यसको सदस्यहरूमा नेपालसहित बंगलादेश, भुटान, म्यान्मार, भारत, श्रीलंका, इन्डोनेसिया, माल्दिभ्स, उत्तर कोरिया, थाइल्यान्ड र टिमोर(लिस्टे छन् ।