उपचारमा जुट्न चिकित्सक संघको आग्रह

अनसनरत डा. गोविन्द केसीको जीवन रक्षाका लागि भन्दै शुक्रबारदेखि अर्को निर्णय नभएसम्मका लागि भन्दै आकस्मिक बाहेक देशका सम्पूर्ण स्वास्थ्य सेवा ठप्प पार्ने बताएको नेपाल चिकित्सक संघले शनिबार विज्ञप्ति प्रकाशित गर्दै संघका सम्पूर्ण चिकित्सकहरुलाई आपतकालिन अवस्थामा स्वास्थ्य उपचारमा जुट्न आग्रह गरेको छ ।

संघले आफ्ना मातहतका शाखा कार्यालयहरुले आफ्ना सदस्यहरुलाई घटना स्थलमा अविलब्म खटाई बाढी पहिरो तथा वर्षाबाट उत्पन्न हुने सरुवा रोगहरुको नियन्त्रण तथा पिडित समुदायलाई आईपर्ने कुनै पनि स्वास्थ्य समस्याको समाधानका लागि सक्रियताका साथ जुट्न अपिल गरेको छ । संघका महासचिव डा. लोचन कार्की हस्ताक्षरित विज्ञप्तिमा डा. केसीको जीवन रक्षाका लागि भन्दै शुक्रबारदेखि सुरु गरिएको स्वास्थ्य संस्था बन्द खोल्ने बिषयमा भने केही कुरा पनि उल्लेख गरिएको छैन । लगातारको बर्षापछि तराईका दर्जनौ जिल्लामा बाढी र पहाडि जिल्लाका गएको पहिरोका कारण ३० जनाको मृत्यु भएको छ भने कयौं घाइते भएका छन ।

गृह मन्त्रालयका अनुसार बाढी र पहिरोमा परेर सुनसरीमा ७, झापामा ४, मोरडमा ३, बारामा १, सर्लाहीमा १, बाकेमा ४, पाँचथरमा ३, दाडमा १, सिन्धुलीमा ४, पाल्पामा १ र बर्दियामा १ गरि ३० जनाको मृत्यु भएको हो ।