‘ निक साइमन्स अवार्ड ’ नुवाकोटकी सिनियर अनमी कञ्चनमाला श्रेष्ठलाई

हेल्थ टुडे,
काठमाडौं,८ चैत : ग्रामिण क्षेत्रमा रहेर सर्वोत्कृष्ठ स्वास्थ्य सेवा प्रदान गर्ने स्वास्थ्यकर्मीलाई प्रदान गरिने ‘निक साइमन्स अवार्ड ’ नुवाकोटको राउतबेसी स्वास्थ्य चौकीमा कार्यरत सिनियर अनमी कञ्चनमाला श्रेष्ठलाई प्रदान गरिएको छ । बुधबार राजधानीमा आयोजना गरिएको अवार्ड वितरण समारोहमा उपप्रधानमन्त्री एवं स्वास्थ्य मन्त्री उपेन्द्र यादवले १२ औं निक साइमन्स अवार्ड सिनियर अनमी श्रेष्ठलाई प्रदान गरेका हुन । ५० वर्षिय श्रेष्ठको मातृशिशुको जीवन रक्षामा ठूलो योगदान गरेको छ । निक साइम्स इन्स्टिच्युटले देशका दुर्मम भागमा रहेर स्वास्थ्य सेवा प्रदान गरिरहेका स्वास्थ्यकर्मी अवार्डका लागि सिफारिस गर्न आव्हान गरेको थियो । उक्त आव्हान पछि ४४ जना स्वास्थ्यकर्मीको मनोनयन परेको थियो ।
राष्ट्रिय स्वास्थ्य तालिम केन्द्रका निर्देशक डा. अनुज भट्टचन, डा.माधव लम्साल, निक साइमन्स इन्स्टिच्युटकी कार्यकारी निर्देशक डा. अचैना अमात्य र नवराज श्रेष्ठ सम्मिलित ४ सदस्यिय निर्माणक समितिले अवार्ड विजेताको छनौट गरेका हुन । देशभरिबाट प्राप्त मनोनयन मध्ये उत्कृष्ठ छानिएका ५ जना मध्ये सर्वोत्कृष्ठ १ जनालाई निक साइमन्स अवार्ड प्रदान गर्ने गरिन्छ । अन्य ४ जना उत्कृष्ठ स्वास्थ्यकर्मीहरु पाचथरका बागबहादुर रोकाया, दैलेखका डम्बर कुमारी शाही, रुपन्देहीका प्रदीपकुमार पण्डित र बाग्लुङका कसिन्द्र शाहीलाई पनि समारोहमा सम्मान गरिएको थियो । कार्यक्रममा स्वास्थ्य मन्त्री यादवले देशका दुर्गम क्षेत्रमा गुणस्तरीय स्वास्थ्य सेवा प्रदान गर्ने काममा नेपाल सरकारलाई सहयोग र सहकार्य गरेकोमा निक साइमन्सलाई धन्यवाद ज्ञापन गरेका थिए । निक साइमन्सका अध्यक्ष विद्याधर मल्लिकको अध्यक्षतामा कार्यक्रम सम्पन्न भएको थियो ।