लायन्स र डब्लूएफपीको सहकार्यमा जाजरकोट र सुर्खेतमा विद्यालय दिवाखाजा कार्यक्रम सुरु

हेल्थ टुडे,
काठमाडौं,३ साउन : लायन्स क्लव इन्टरनेशनल फाउण्डेसन र संयुक्त राष्ट्रसंघिय विश्व खाद्य कार्यक्रम (डब्लूएफपी) को सहयोगमा कर्णाली प्रदेशको जाजरकोट र सुर्खेतमा स्थानिय उत्पादनमा आधारित विद्यालय दिवा खाजा कार्यक्रम सुरु गरिएको छ । उक्त कार्यक्रमबाट यी दुई जिल्लाका १४ पालिकाका ८ सय विद्यालयमा अध्ययनरत ९० हजार विद्यार्थी लाभान्वित हुने छन् ।
उक्त कार्यक्रमको बिहीबार राजधानीमा आयोजित विशेष कार्यक्रममा शुभारम्भ गरिएको छ । उक्त कार्यक्रमको शिक्षा मन्त्रालयका प्रतिनिधि दिपक शर्मा, डब्लूएफपीका कन्टी डाइरेक्टर रोवर्ट कास्का, लायन्स क्लव इन्टरनेशनल फाउन्डेसनका अध्यक्ष फाब्रिसियो ओलिभेरा र लायन्स क्लव इन्टरनेशनलका इन्टरनेशनल डाइरेक्टर बालकृष्ण बुर्लाकोटीले संयुक्त रुपमा शुभारम्भ गरेका हुन । उक्त दिवा खाजा कार्यक्रममा कक्षा ५ सम्म अध्ययनरत विद्यार्थीहरु स्थानिय स्तरमै उत्पादन भएका खानेकुरा खुवाइने छ । लायन्स क्लव इन्टरनेशनल फाउन्डेसनका अध्यक्ष फाब्रिसियो ओलिभेराले यो कार्यक्रमले स्थानिय उत्पादनलाई महत्व दिनुका साथै विद्यार्थीहरुको पोषणको अवस्थामा सुधार आउने बताए ।
यो कार्यक्रमबाट स्थानिय कृषक समेत लाभान्वित हुनेमा उनले जोड दिए । लायन्स क्लव इन्टरनेशनलका इन्टरनेशनल डाइरेक्टर बालकृष्ण बुर्लाकोटीले स्थानिय उत्पादनलाई प्रोत्साहित गर्ने यो नौलो किसिमको कार्यक्रम भएको बताए । विश्व खाद्य कार्यक्रम अमेरिका र लायन्स क्लव ईन्टरनेशनल फाउण्डेसनले संयुक्त राष्ट्रसंघिय विश्व खाद्य कार्यक्रमको लागि नेपाल सहित चार देशका लागि विद्यालय दिवा खाजा कार्यक्रम सञ्चालन गर्न ४० लाख अमेरिकी डलर सहायता दिएको थियो ।