स्वास्थ्य मन्त्री पौडेलद्वारा अंगदानको घोषणा

हेल्थ टुडे,
भक्तपुर, २९ साउन : स्वास्थ्य तथा जनसंख्या मन्त्री प्रदीप पौडेलले अंगदानको घोषणा गरेका छन् । विश्व अंगदान दिवसको अवसरमा भक्तपुरस्थित शहीद धर्मभक्त राष्ट्रिय प्रत्यारोपण केन्द्रले मंगलबार आयोजना गरेको कार्यक्रममा स्वास्थ्य मन्त्री पौडेलले आफ्नो मृत्यु पश्चात अन्य व्यक्तिमा प्रत्यारोपण गर्न सकिने शरीरका अंगहरु दान दिएको घोषणा गरेका हुन । मन्त्री पौडेलले भने,‘विश्व अंगदान दिवसको अवसर पारेर म पनि मेरो मृत्यु पश्चात अरु व्यक्तिमा प्रत्यारोपण गर्न मिल्ने सबै अंगहरु दान गरेको आजै घोषणा गर्दछु ।’मन्त्री पौडेलले अंगदान गरेको घोषणा गरेपछि आवश्यक काजजातमा पनि सहीछाप परेका छन् । अंगदान घोषणा गरेपछि स्वास्थ्य मन्त्री पौडेललाई शहीद धर्मभक्त राष्ट्रिय प्रत्यारोपण केन्द्रका कार्यकारी निर्देशक डा. पुकारचन्द्र श्रेष्ठले अंगदान गरेको कार्ड प्रदान गरेका थिए । कार्यक्रममा बाग्मती प्रदेशका स्वास्थ्य मन्त्री किरण थापा र भक्तपुर क्षेत्र नम्बर २ का सांसद दुर्लभ थापाले पनि अंगदानको घोषणा गरेका छन् । कार्यक्रममा अंगदान गर्ने र उनका परिवारका सदस्यहरुलाई मन्त्री पौडेलले सम्मान गरेका थिए ।