विपद् जोखिम न्यूनीकरण प्राधिकरणका कार्यकारी निर्देशक भट्टद्वारा पदभार ग्रहण

हेल्थ टुडे,
काठमाडौं, ५ चैत : राष्ट्रिय विपद् जोखिम न्यूनीकरण तथा व्यवस्थापन प्राधिकरणका नवनियुक्त कार्यकारी निर्देशक ई.दिनेशप्रसाद भट्टले मंगलबार पदभार ग्रहण गरेका छन् । सिंहदरवार स्थित प्राधिकरणको कार्यालय पुगेर भट्टले पदभार ग्रहण गरेका हुन । सोमबार बसेको मन्त्रीपरिषद्को बैठकले एक नम्बरमा सिफारिस भएका बैतडीका वातावरणविद् भट्टलाई प्राधिकरणको कार्यकारी निर्देशक नियुक्त गरेको थियो । पदभार ग्रहण कार्यक्रममा बोल्दै कार्यकारी निर्देशक भट्टले विपद् पूर्वतयारी र जोखिम न्यूनीकरणका प्रयासहरुमार्फत् जनधनको क्षति कम गर्न ठोस योजना सहित आफु लाग्ने बताए ।
प्राधिकरणको अहिलेको जनशक्ति प्रयाप्त नभएको बताउदै प्राधिकरणको उद्देश्य अनुसार प्रतिफल दिन पर्याप्त जनशक्ति व्यवस्थापनमा आफ्नो ध्यान रहनेमा उनले जोड दिए ।
भट्ट इन्जिनियरिङ अध्ययन संस्थान पुल्चोक क्याम्पसका पुव उपप्राध्यापक हुन । पुल्चोक क्याम्पसबाट सिभिल इन्जिनियरिङमा स्नातक गरेका भट्टले पुल्चोक क्याम्पसबाटै वातावरणीय सिभिल इन्जिनियरिङमा स्नातकोत्तर गरेका हुन । भट्ट जलवायु परिवर्तन विषयमा विद्यावारिधि गर्दैछन् । भट्टका सिभिल इन्जिनियरिङ , वातावरण र जोखिम न्यूनिकरण सम्बन्धी करिव आधा दर्जन पुस्तक प्रकाशित छन् ।
प्राधिकरणको रिक्त सीईओका लागि सरकारले गत मंसिर १४ गते नियुक्तीका लागि दरखास्त आव्हान गरेको थियो । योग्यता, तालिम, अनुभव र विज्ञताका आधारमा छनौट समितिले एक नम्बरमा भट्टको नाम मन्त्रीपरिषद् समक्ष सिफारिस गरेको थियो । बैतडीको दरशरथचन्द नगरपालिका ५ नोहाटमा जन्मेका भट्टले एसएलसीसम्मको शिक्षा गृह जिल्ला बैतडीमै पुरा गरेका थिए भने प्रमाण पत्र तहको शिक्षा भारतको पिथौरागडबाट पुरा गरेका थिए । पढाईमा अब्बल भट्टले छात्रवृतिमै आफ्नो अध्ययन सकेर इन्जिनियरिङ विषय प्राध्यापनमा दुई दशक विताएका छन् । भट्टले संयुक्त राष्ट्र संघका विभिन्न निकाय सहित सरकारी र गैरसरकारी निकायमा परामर्शदाताका रुपमा पनि वातावरण र विपत व्यवस्थापनका बिषयमा काम गरिसकेका छन् ।