कार्यबोझले ’मानसिक रोगी’ भएको भन्दै भारतीय बैंकका कर्मचारी आन्दोलनमा

हेल्थ टुडे,
नयाँ दिल्ली, ६ चैत : भारतमा बैंक कर्मचारीहरुले कार्य घण्टा धेरै भएको र त्यसले कर्मचारीहरु मानसिकरुपमै रोगी भएको भन्दै देशव्यापी आन्दोलनको घोषणा गरेका छन् ।
युनाइटेड फोरम अफ बैंक युनियन’ले मार्च २४ र २५ तारिख (फागुन १२ र १३ गते) देशव्यापी बैंक तथा वित्तीय संस्था बन्दसहितका हडतालको आयोजना गरेको छ । यो बन्दपछि पनि आफ्ना माग पुरा नगरिए अनिश्चितकालिनरुपमा बैंक तथा वित्तीय संस्था बन्द लगायतका अझै कठोर कदम चाल्ने युनियनले चेतावनी दिएको छ ।
युनियनले बैंकका कर्मचारीलाई व्यवस्थापन पक्षले अति नै बढी काम गराउने भएकोले हजारौं कर्मचारीहरु मानसिक रोगी भइरहेकोले उनीहरुलाई सातामा दुई दिन विदा अनिवार्य भएको दावी गरेको छ ।
युनियन भारतका बैंक तथा वित्तीय संस्थामा कार्यरत कर्मचारीहरुको सबैभन्दा ठूलो संगठन हो ।संगठनले राखेका मागमा सातामा शनिबार र आइतबार विदा दिनु पर्नेसहित कर्मचारीको तलव सुविधा वृद्धि गर्नु पर्ने, बैंकिङ कर्मचारीको सुरक्षा ग्यारेण्टी गर्नुपर्ने लगायतका माग रहेका छन् ।