रेविकाको उपचारकोलागि कोटेश्वर क्याम्पसद्वारा ३५ हजार रुपैया सहयोग

हेल्थ टुडे,
काठमाडौं, २१ चैत : एक हप्ता अगाडि चैत १५ गतेको आन्दोलनका दिन कार्यालयबाट डेरा फर्कने बेला अनाहकमा कोटेश्वरमा प्रहरीको गोली लागेर गम्भिर भएकी रेविका खत्रीको उपचारका लागि कोटेश्वर बहुमुखी क्याम्पसले ३५ हजार रुपैया आर्थिक सहयोग गरेको छ । स्वतन्त्र विद्यार्थी युनियन र क्याम्पसको तर्फबाट उक्त सहयोग रकम बिहीबार रेविकाको बुबालाई हस्तान्तरण गरिएको हो । कोटेश्वर बहुमुखी क्याम्पसका क्याम्पस प्रमुख डा. प्रकाश पोखरेल र स्वतन्त्र विद्यार्थी युनियनका सभापति संञ्जय बुढाथोकीले सिभिल अस्पताल मिनभवन पुगेर उक्त रकम हस्तान्तरण गरेका हुन । रेविका कोटेश्वर बहुमुखी क्याम्पसमा व्यवस्थापन संकाय तेश्रो वर्षमा अध्ययन विद्यार्थी हुन । उनको मिन भवनस्थित सिभिल अस्पतालको सघन उपचार कक्ष (आईसियू) मा उपचार भइरहेको छ । यसका साथै रेविकाको बाकी पढाई नि:शुल्क गर्ने समेत कोटेश्वर क्याम्पसले निर्णय गरेको क्याम्पस प्रमुख डा. पोखरेलले जानकारी दिए । रेविकाको उपचारको जिम्मा सरकारले लिनु पर्ने र आन्दोलनमा सहभागी नै नभएको निर्दोश विद्यार्थी माथि गोली हान्ने माथि कडा कारवाहीको माग गर्दै स्वतन्त्र विद्यार्थी युनियनको नेतृत्वमा कोटेश्वर क्याम्पसमा अध्ययनरत विद्यार्थीहरुले दिनहू प्रदर्शन गरिरहेका छन् । स्ववियू सभापति बुढाथोकीले रेविकाको उपचारमा कुनै कमि हुन नदिन आफुहरुले सक्दो सहयोग र सरकारलाई खबरदारी गरिरहने बताए ।