मानव अंग प्रत्यारोपण केन्द्रलाई शून्यबाट शिखरमा पुगाएर सेवा निवृत भए डा. पुकार

हेल्थ टुडे,
काममाडौं, ७ असोज : शहीद धर्मभक्त राष्ट्रिय प्रत्यारोपण केन्द्रका कार्यकारी निर्देशक एवं वरिष्ठ अंग प्रत्यारोपण सर्जन डा.पुकारचन्द्र श्रेष्ठ सेवा निवृत भएका छन् । मंगलबारदेखि उनी उमेर हदका कारण सरकारी सेवाबाट सेवा निवृत भएका हुन । विसं २०६९ सालमा स्वास्थ्य तथा जनसंख्या मन्त्रालय मातहत रहेको केन्द्रको स्थापना कालदेखि नै डा.पुकार केन्द्रको निर्देशकको रुपमा कार्य गर्दै आइरहेका थिए । केन्द्रले असोज ७ गते भव्य कार्यक्रमको आयोजना गरि कार्यकारी निर्देशक डा. पुकारको विदाई गरेको छ ।
वरिष्ठ कलाकार मदनकृष्ण श्रेष्ठ, केन्द्रको सञ्चालक समितिका सदस्य एवं संस्कृतिविद् तिलक कायस्थ, समाजसेवी सोम थापा सहित केन्द्रका कर्मचारीले डा. पुकारको योगदानको कदर गर्दे सम्मान सहित विदाइ गरेको हो । प्रत्यारोपीहरुका तर्फबाट झंक श्रेष्ठ, केन्द्रका कर्मचारीका तर्फबाट डा. कल्पना श्रेष्ठ, स्थानियवासीका तर्फबाट सोम थापा, नागरिक समाजका तर्फबाट मदनकृष्ठ श्रेष्ठले डा. पुकारले कलेजो र मिर्गौला प्रत्यारोपण सेवालाई सून्यदेखि शिखरसम्म पुर्याएर देशलाई अमूल्य योगदानको कदर स्वरुप दोसल्ला ओढाएर सम्मान गरेका थिए । सो अवसरमा डा. श्रेष्ठकी पत्नी नविना श्रेष्ठलाई पनि सम्मान गरिएको थियो । विदाई कार्यक्रममा बोल्दै वरिष्ठ कलाकार मदनकृष्ण श्रेष्ठले डा. पुकारको सक्षम नेतृत्व र केन्द्रका कर्मचारीको अथक प्रयासका कारण नै केन्द्रले देशकै सबैभन्दा बढी मिर्गौला र कलेजो प्रत्यारोपण गर्ने केन्द्रका रुपमा स्थापित भएको बताए ।

१३ वर्षको अवधीमा १५ सय भन्दा बढी मिर्गौला पत्यारोपण, ३५ जनाको कलेजो प्रत्यारोपण, ७ जनाको मस्तिष्क मृत्यु भएका व्यक्तिको अंगदानबाट १३ जनामा मिर्गौला, ४ जनामा कलेजो तथा एक जनामा कलेजो र मिर्गौलाको सफल प्रत्यारोपण गरेर इतिहास रच्न सफल भएकोमा डा. पुकार सहित केन्द्र परिवारलाई धन्यवाद दिए । प्रत्यारोपी झंक श्रेष्ठले डा. पुकारले नेपालको अंग प्रत्यारोपणको क्षेत्रमा दिएको योगदान सबै नेपालीले सधै स्मरण गरिरहने बताउदै डा. श्रेष्ठको अवकास प्राप्त जिवनको शुभकामना व्यक्त गरे । केन्द्रका प्रशासनिक अधिकृत हरिहर पोखरेलले डा. श्रेष्ठ अवकासमा गए पनि केन्द्रलाई उहाँको साथ, सहयोग र सल्लाह सधै प्राप्त भइरहने विश्वास व्यक्त गरे ।
वरिष्ठ नेफ्रोलोजिष्ट डा. कल्पना श्रेष्ठले डा. पुुकारको योगदान सधै स्मरण रहने बताइन । विदाई समारोहलाई सम्बोधन गर्दै सेवा निवृत डा. पुकारले केन्द्रको स्थापनाकाल देखि अहिलेको अवस्थासम्म सहयोग गर्ने व्यक्तिहरुलाई स्मरण गर्दै सबैको साथ र सहयोगले केन्द्रले अहिलेको सफलता प्राप्त गरेको बताए । मिर्गौला प्रत्यारोपणका क्षेत्रमा केन्द्रमार्फत शून्यदेखि शिखरसम्म पुर्याउन केन्द्रका चिकित्सक, स्वास्थ्यकर्मी र कर्मचारीको योगदानको उच्च मूल्यांकन गर्दै भविश्यमा पनि आफुले सक्दो सहयोग गर्न तत्पर रहेको डा. पुुकारले बताए । सो अवसरमा केन्द्रको अन्तर कथा नामक पुस्तकको समेत विमोचन गरिएको थियो ।