अब सिंहदरबार भित्रै हुने भयो निजामती कर्मचारीको स्वास्थ्य जाँच

हेल्थ टुडे,
काठमाडौं, १९ असार : निजामती कर्मचारी अस्पतालको सेवा इकाइ सञ्चालनमा आएको छ । आजदेखि संघीय मामिला तथा सामान्य प्रशासन मन्त्रालय भवनको तल्लो तलामा सेवा इकाइ सञ्चालनमा आएको हो । शुभारम्भका क्रममा संघीय मामिला तथा सामान्य प्रशासन मन्त्री प्रतिभा रावलले रक्तचाप परीक्षण गराएकी थिइन् ।

निजामती कर्मचारीलाई सहज र छिटो स्वास्थ्य सेवा उपलब्ध गराउने उद्देश्यले अस्पतालको सेवा इकाइ सिंहदरबारभित्रै संचालनमा ल्याइएको बताइएको छ । मन्त्रालयका अनुसार कर्मचारीहरूले स्वास्थ्य सेवाका लागि अस्पतालसम्म धाउनुपर्ने बाध्यता कम गर्न कार्यस्थलमै स्वास्थ्य सेवा उपलब्ध गराइएको हो ।

निजामती कर्मचारी अस्पतालका अनुसार सेवा इकाइले अस्पतालसम्म पुग्नुअघि आवश्यक प्रारम्भिक स्वास्थ्य परीक्षण र परामर्श प्रदान गर्नेछ । ‘मन्त्रालयका कर्मचारीले सामान्य परीक्षणका लागि अस्पतालसम्म आउनुपर्ने अवस्था अन्त्य गर्ने उद्देश्यले सेवा इकाइ सञ्चालन गरिएको हो । यहाँ रगत संकलन, प्रारम्भिक स्वास्थ्य परीक्षण र आवश्यक प्रयोगशाला परीक्षण गरिन्छ। परीक्षणका आधारमा थप उपचार वा विशेषज्ञ सेवाको आवश्यकता देखिएमा बिरामीलाई अस्पतालमा रिफर गरिन्छ,’ अस्पताल श्रोतले भन्यो ।  सेवा इकाइमार्फत चिकित्सक (फिजिसियन)बाट प्रारम्भिक स्वास्थ्य परीक्षण, स्वास्थ्य परामर्श, प्रयोगशालाका लागि नमुना संकलन तथा आवश्यकताअनुसार अस्पतालमा रिफर गर्ने व्यवस्था गरिएको छ ।
यो भन्दा पहिले वीर अस्पतालले पनि इकाई स्थापना गरेर समान्य सेवा दिने गरेको थियो ।