युवाका आकांक्षा समेट्न जनसांख्यिकीय नीति बनाउन सरकार र युएनएफपिएको जोड

हेल्थ टुडे,

काठमाडौं, १ साउन : विश्व जनसंख्या दिवस २०२६ को अवसरमा नेपाल सरकार, राष्ट्रिय युवा परिषद् र युएनएफपिएले युवाकेन्द्रित जनसांख्यिकीय नीति निर्माणमा जोड दिएका छन् ।
काठमाडौंमा आयोजित कार्यक्रममा १५० भन्दा बढी युवासहित नीति निर्माताबीच नेपालको जनसांख्यिकीय परिवर्तन र विकास नीतिमा युवाको आवाज समेट्ने विषयमा छलफल भएको थियो । सो अवसरमा युएनएफपिएको ’जनसांख्यिकीय भविष्य सर्वेक्षण’ को नेपाल संस्करण पनि सार्वजनिक गरिएको छ ।
सर्वेक्षणले आर्थिक अनिश्चितता, रोजगारी, आवासलगायत चुनौतीका बाबजुद युवाहरूले गुणस्तरीय जीवन, सुखी परिवार र आफ्ना प्रजनन अधिकार सुनिश्चित गर्न चाहेको देखाएको छ ।
कार्यक्रमका प्रमुख अतिथि प्रतिनिधिसभाको स्वास्थ्य, शिक्षा तथा सूचना प्रविधि समितिका सभापति डा. ओजस्वी शेरचनले तथ्यमा आधारित नीतिमार्फत युवाका आकांक्षा सम्बोधन गर्नुपर्नेमा जोड दिनुभयो ।
राष्ट्रिय युवा परिषद्का प्रशासकीय प्रमुख गेहनाथ गौतमले नेपालले जनसांख्यिकीय लाभांशको अधिकतम उपयोग गर्न निर्माणाधीन रोडम्यापमा युवाको वास्तविक आवाज समेट्नुपर्ने बताउनुभयो । युएनएफपिए नेपालका राष्ट्रिय प्रतिनिधि श्रीराम हरिदासले जनसांख्यिकीय परिवर्तन केवल जनसंख्याको विषय नभई युवाको आशा, आकांक्षा र अवसरसँग जोडिएको भन्दै प्रत्येक युवालाई आफ्नो भविष्य निर्माण गर्ने वातावरण सिर्जना गर्नुपर्ने उल्लेख गर्नुभयो । कार्यक्रममा अन्तरपुस्ता संवादसमेत आयोजना गरिएको थियो, जहाँ युवाहरूले शिक्षा, रोजगारी, बसाइँसराइ र पारिवारिक जीवनसँग सम्बन्धित चुनौतीबारे आफ्ना धारणा राखेका थिए ।