हेल्थ टुडे
काठमाडौं, ८ मंसिर : बंगालादेशका विभिन्न अवैधानिक मेडिकल कलेजहरुमा करिव २ सय जना नेपाली विद्यार्थी पढिरहेको जानकारी बंगलादेशस्थित नेपाली राजदुतावासले नेपाल मेडिकल काउन्सिललाई गराएपछि काउन्सिलले तत्काल बंगालादेशमा मेडिकल पढ्न रोक लगाएको जनाएको छ । कानून बिपरित स्थापना भएर पैसा कमाउने उद्देश्यका साथ स्थापना भएका ती मेडिकल कलेजहरुलाई काउन्सिलले कालो सुचीमा राखेको छ ।
तिन वर्ष पहिले पनि यसरी नै गैरकानूनी मेडिकल कलेज फेला परेपछि नेपाल मेडिकल काउन्सिलले त्यहाँका १२ वटा मेडिकल कलेजहरुलाई कालोसूचिमा राखेको थियो । ठूलो संख्यामा नेपाली विद्यार्थी एमविविएस र एमडी अध्ययनका लागि बंगालादेश जाने गरेका छन् । काउन्सिलका रजिस्टार डा. दीलिप शर्माले भने, ‘दूतावास मार्फत करिव २ सय विद्यार्थी अवैध मेडिकल कलेजमा पढिरहेको जानकारी पाएपछि बंगालादेश पठाउन रोक लगाएका छौ । ’ नेपालका मेडिकल कलेजहरुमा पढ्न मेरिटमा नाम निकाल्न नसक्नेहरु विभिन्न कन्सल्टेन्सी मार्फत एमविविएस पढ्न बंगालादेश जाने गरेका छन् । बंगालादेशका मेडिकल कलेजहरुमा मेडिकल पढ्न यहाँ लिइने प्रवेश परीक्षामा कम्तिमा पनि ५० नम्बर ल्याउनु पर्ने प्रावधान छ ।
बंगलादेशस्थित नेपाली दूतावासले त्यस्ता विद्यार्थीहरुलाई उद्धारको पहल पनि गरिरहेको प्रवक्ता शर्माले जानकारी दिए । ‘पठाउने एजेन्टहरुले बदमासी गरे । राम्रोसँग नबुझिकन जाँदा धोका भयो,’ काउन्सीलका प्रवक्ता शर्माले भने, ‘ राजदुतावासले उनीहरुको उचित प्रवन्ध मिलाउने कोशिष गरिरहेको छ ।’ बंगलादेशमा नेपालीले पढिरहेका कुनै कलेजहरुले सरकारी मापदण्ड पूरा नगरेको, विश्वविद्यालयबाट सम्वन्धन नलिएको र कुनै दर्ता नै नभएको पाइएको छ । ‘मेडिकल पढाउने कलेजहरु कुनै न कुनै विश्वविद्यालयमा दर्ता त हुनुपर्ने तर त्यसो नभएको पाइयो’ शर्माले भने, ‘समस्या आयो भने अर्को विश्वविद्यालयमा ट्रान्सफर गर्ने दायीत्व हुन्छ तर कलेजहरुले त्यस्तो पनि नगरेको पाइएको छ ।’ बंगलादेशमा एमबीबीएस पढ्न करिब करिव ४० लाख देखि ५० लाख रुपैयाँसम्म खर्च लाग्छ । यो रकम किस्ताबन्दीमा तिर्न मिल्ने र भिसा पनि सजिलै पाइने भएकाले धेरै नेपाली विद्यार्थीहरु बंगलादेशमा पढ्न जाने गरेका छन् ।
Leave a Reply