हेल्थ टुडे,
काठमाडौं ८ पुष : व्यवस्थापनले आफूहरुका माग सुनवाई नगरेको भन्दै ग्वार्कोस्थित किस्ट मेडिकल कलेजमा कार्यरत नर्स सहित कर्मचारी आन्दोलनमा उत्रिएका छन् । आन्दोलन चर्किएपछि त्यहाँको ओपिडी सेवा ठप्प भएको छ । समय अनुसार तवल भत्ता वृद्वि हुनु पर्ने, औषधि उपचारको व्यवस्था हुनु पर्ने, जोखिम भत्ता पाउनु पर्ने र ठेकेदारमार्फत कर्मचारी भर्ना गर्ने प्रथा बन्द हुनु पर्ने लगायतका १५ बुदे माग राखेर उनीहरु आन्दोलनमा उत्रिएका हुन् ।
आन्दोलनकै कारण अस्पतालको ओपिडी सेवा र प्रशासन बन्द भएको छ । माग सम्बोधनका बिषयमा आन्दोलनरत पक्ष र कलेज प्रशासनबिच ठोस वार्ता हुन सकिरहेको छैन् । दुई वर्ष पहिले भएको सहमती अनुसार सेवा सुविधा बढाउने तर्फ प्रशासनले कुनै चासो नदिएकोले आन्दोलनमा उत्रिनु परेको अखिल नेपाल स्वास्थ्य श्रमिक संघ किस्ट मेडिकल कलेज इकाईका अध्यक्ष रुपेश केसीले बताए ।
अस्पतालको ओपिडी सेवा बन्द भए पछि उपचारका लागि अस्पताल पुगेका बिरामी बिना उपचार फर्कन बाध्य भएका छन् । अस्पताल प्रशासनले भने सरकारले मेडिकल कलेजको सिट संख्या घटाउदै लगेपछि तलव सुविधा बढाउन नसकिएको बताएको छ । एक सय ५० सिट एमविविएस पढाई हुने कलेजको सिट संख्या बर्षेनी घटाएर यो वर्ष ९० मा झारेपछि आम्दानी घटेका कारण सुविधा बढाउन नसकिएको अस्पतालका वरिष्ठ प्रशासक अक्षय गौतमले बताए । डा. गोविन्द केसीको आन्दोलनका कारण सरकारले मेडिकल कलेजको सिट सय भन्दा बढी तोक्न नपाउने नियम बनाएको छ । ‘सरकारले १५० सिट पढाउन पाउने निमय बनाएपछि मात्र कर्मचारीको सेवा सुविधा बढाउन सकिन्छ, अन्यथा सकिदैन, गौतमले भने । कर्मचारी भने आफ्ना काम पुरा नभए आन्दोलन नरोक्ने अडानमा छन् । किष्टमा प्राध्यापक, चिकित्सक, नर्स र कर्मचारी गरि करिव ४ सय जना कार्यरत छन् ।
Leave a Reply