विश्व क्यान्सर दिवसमा दीप प्रज्वलन

हेल्थ टुडे,

काठमाडौं :  ऋचा बजिमय मेमोरियल फाउन्डेसनले विगतका वर्ष जस्तै क्यान्सरबाट दिवंगत हुनुभएका, क्यान्सरसँग लडिरहेका र क्यान्सरमाथि विजय हासिल गरेकाहरुको सम्मान तथा सम्झनामा दीप प्रज्वलनका साथै दीप यात्रा गरी विश्व क्यान्सर दिवस २०१८ मनाएको छ । पाटन दरबार स्क्वाएरमा भएको कार्यक्रममा क्यान्सरविरुद्ध विजयी, क्यान्सर प्रभावित परिवार तथा क्यान्सरसंग आवद्ध विभिन्न व्यक्तित्व तथा संघसंस्थाको उपस्थिति थियो । कार्यक्रममा क्यान्सरमाथि विजय प्राप्त गरेकाहरुले आफ्ना प्रेरणादायी अनुभव साटेका थिए । करिब २० मिनेटको दीप यात्रा पश्चात मण्डलाकार मण्डपमा दीप प्रज्वलन गरेर इच्छुकहरुलाई सन्देश लेख्न दिई दीप प्रज्वलित गरिएको थियो । ऋचा बजिमय मेमोरियल फाउन्डेसनले विगत २००७ सालदेखि क्यान्सरको भयबाट मुक्त समाज बनाउने परिकल्पना लिएर काम गर्दै आइरहेको अध्यक्ष डा. दीपक सुन्दर श्रेष्ठले जानकारी दिए ।