औषधि व्यवस्था विभाग खारेज गर्ने तयारी 

हेल्थ टुडे,

काठमाडौं, २१ फागुन : स्वास्थ्य मन्त्रालयले औषधि व्यवस्था विभाग खारेज गर्ने बिषयमा छलफल थालेको छ । विभागमा प्रयाप्त कर्मचारी नभएको कारण देखाउदै मन्त्रालय खारेज गर्ने निर्णयमा पुगेको हो । स्वास्थ्य सचिव डा. पुष्पा चौधरीले मन्त्रालय र विभागका उच्च अधिकारीसंग औषधि व्यवस्था विभाग खारेज गर्ने बिषयमा शुक्रबार छलफल गरेकी थिइन । स्रोतका अनुसार सचिव चौधरीले औषधि व्यवस्था विभागको कुनै पनि काम नभएको भन्दै स्वास्थ्य सेवा विभाग मातहत औषधि व्यवस्था विभागलाई महासाखा माहतत राख्नु पर्ने धारणा राखेकी थिइन । औषधिको गुणस्तर मापन र अनुगमन जस्ता कार्य गर्ने विभागलाई मन्त्रालयले सेवा जस्तो ठानेको विभागका अधिकारीहरुको आरोप छ । ‘ विभागले प्रादेशिक संरचनाको व्यवस्थापन गर्नु पर्ने छ,’ औषधि व्यवस्था विभागका महानिर्देशक नारायण ढकालले भने, ‘देश भरिको औषधिको व्यवस्थापन गर्ने विभाग नै खारेज गरिनु आश्चर्यको बिषय हो । ’ संघिय संरचना अनुसार केन्द्रमा औषधि व्यवस्था विभाग रहने उल्लेख छ । स्वास्थ्य सचिव डा. चौधरीले निहीत स्वार्थका लागि विभाग खारेज गर्ने उद्देश्य लिएको विभागका कर्मचारीको आरोप छ । डा. चौधरीको निर्णयको चौतर्फी बिरोध भएपछि उनले यस बिषयमा मन्त्रालयले ठोस निर्णय लिइनसकेको बताएकी छन । स्वास्थ्य मन्त्रालयका पूर्व सचिव डा. प्रबिण मिश्र विभाग खारेज गर्नु आत्मघाती हुने बताए । विभाग खारेज गरिए औषधिमा गम्भिर असर पर्ने बताउदै डा. मिश्रले यसलाई खारेज गर्नुको सट्टा शक्तिशाली बनाउनु आवश्यक रहेको बताए । विभाग राखेज गर्ने कुरा बाहिर आएपछि प्रधानमन्त्री कार्यालयले यस बिषयमा स्वास्थ्यका अधिकारीसँग अनौपचारिक कुराकानी गरेको स्रोतले बताएको छ । ( नयाँ पत्रिकाबाट )