विशेषज्ञ चिकित्सक लाइसेन्स परीक्षामा ४६ प्रतिशत डाक्टर फेल

काठमाडौं, २८ फागुन : नेपाल मेडिकल काउन्सिलले लिएको विशेषज्ञ चिकित्सक लाइसेन्स परीक्षामा ५४ प्रतिशत डाक्टर पास भएका छन् ।काउन्सिलले २६ फागुन (शनिबार)मा लिएको परीक्षामा ४६ प्रतिशत डाक्टर फेल हुँदा विशेषज्ञताको लाइसेन्स लिनबाट वञ्चित भएका छन् ।फेल हुने अधिकांश डाक्टर विदेशमा अध्ययन गरेका छन् । काउन्सिलले विशेषज्ञ चिकित्सकका रूपमा काम गर्न अनुमति दिन वर्षमा चारपटक विशेषज्ञ चिकित्सक लाइसेन्स परीक्षा गराउँदै आएको छ ।

‘यसअघि ७० प्रतिशत डाक्टर विशेषज्ञ चिकित्सक लाइसेन्स परीक्षामा पास भएका थिए’, मेडिकल काउन्सिलका रजिस्ट्रार डा. दिलीप शर्माले भने, ‘यसपटक ५४ दशमलव ४ प्रतिशत डाक्टर मात्रै पास भए ।यो संख्या अत्यन्तै न्यून हो ।’ चार महिनाको अवधिमा १६ प्रतिशतले पासदरमा कमी आउनुलाई गम्भीर रूपमा लिएको काउन्सिलले जनाएको छ ।चिकित्सा क्षेत्रमा देखिएको बन्दहडताल आन्दोलनको प्रत्यक्ष प्रभाव रिजल्टमा परेको हुन सक्ने काउन्सिलको अनुमान छ ।डा. शर्माका अनुसार यसपटकको परीक्षामा ३९ विधामा डाक्टरहरूले परीक्षा दिएका थिए । ३ सय २२ जनाले परीक्षा फारम भरे पनि चारजना अनुपस्थित थिए । ३ सय १८ जना डाक्टरले परीक्षा दिएकोमा १ सय ७३ जना मात्रै पास भएको डा. शर्माले बताए ।