जर्मनको सहयोगमा स्वास्थ्य चौकी निर्माण

नुवाकोट, ४ जेठः गाउँमा भएको स्वास्थ्य चौकी २०७२ सालको भूकम्पले तहसनहस बनाएपछि सानोतिनो बिरामी हुँदा उपचारका लागि सुरुका दिनमा निकै समस्या भयो नुवाकोटका सिक्रेवासीलाई ।
काठमाडौँबाट २८ किलोमिटरको दूरीमा रहेको हालको शिवपुरी गाउँपालिका वडा नं ४ सिक्रेमा भूकम्पको चार वर्षपछि अवस्था फेरिएर सिक्रेमा नयाँ स्वास्थ्य चौकी निर्माण भएको छ । सिक्रेमा स्वास्थ्य चौकी निर्माण भएपछि सामान्य रोगका लागि काठमाडाँै धाउनुपर्ने बाध्यता अन्त्य भएको छ ।
भूकम्पले पहिलेको भवन भत्काइ दिएपछि टहरामा बसी काम गर्नुपर्ने समस्या भोगिरहेका शिवपुरी गाउँपालिका वडा नं ४ का जनताको समस्या पक्की भवन निर्माण भएपछि समाप्त भएको बताउछन ।
जर्मन सहयोग नियोग (जिआइजेड)को ‘रिकभरी प्रोग्राम नेपाल’ कार्यक्रम अन्तर्गत शिवपुरी गाउँपालिका वडा नं ४ मा पक्की कार्यालय भवन र प्रिफ्याव स्वास्थ्य चौकी निर्माण भएको हो ।
रु ४६ लाख ७९ हजारको लागतमा वडा कार्यालयको पाँचकोठे पक्की भवन निर्माण भएको जिआइजेडको रिकभरी कार्यक्रम नेपालका नुवाकोट जिल्ला संयोजक सिद्धार्थ शर्माले जानकारी दिनुभयो । जिआइजेडले हाल दुप्चेश्वर गाउँपालिकामा विद्यालयका लागि कक्षाकोठाको भवन निर्माण, स्वास्थ्यसम्बन्धी एकीकृत तथ्यांक संकलन, कृषिमा आधारित जीविकोपार्जन लगायतका कार्यक्रम गर्दै आएको छ ।
रासस