जीवन बचाइदिन याचना

बेनी, ४ असारः बेनी नगरपालिका– २ गौश्वाराकी २० वर्षीया तारा शर्माको दुवै मिर्र्गौला खराब भएपछि पोखरास्थित मणिपाल अस्पतालको श्ययामा छट्पटाइ रहनुभएको छ ।
शर्माले आर्थिक सहयोग गरी आफ्नो जीवन बचाइदिन याचना गरिरहनुभएको छ । उहाँ दुई महिनादेखि मणिपाल शिक्षण अस्पतालमा उपचार गराउँदै आउनुभएको छ । आर्थिक अवस्था अत्यन्त कमजोर भएकी शर्मालाई हप्तामा दुई पटक डायलसिस गर्नुपर्ने हुन्छ ।
एक पटक डायलसिस गरे रु पाँच हजार खर्च लाग्छ । दुवै मिर्गौला प्रत्यारोपण गर्न रु नौ लाख लाग्ने शर्माका दाजु गोकुलले बताउनुभयो । घरको अवस्था दयनीय भएकोले, मिर्गौला प्रत्यारोपण त परको कुरा भयो, डायलासिस गर्ने र औषधि किन्ने खर्च समेत नभएको खाजु बताउनुहुन्छ । दुई महिनादेखि छोरीको उपचारमा खट्नुभएका खडानन्द थकित अवस्थामा हुनुहुन्छ । वैदेशिक रोजगारीमा मलेशिया गएका छोरा गोकुल बिरामी परेर घर फर्किनु भएपछि भएको सम्पत्ति छोराको उपचारमा सकिएको र अब छोरीको मिर्गौला प्रत्यारोपण गर्न रुपैयाँ नभएको ६८ वर्षीय खडानन्दले बताउनुभयो ।
रासस